कडेगाव, दि. १८ जून : महाराष्ट्र शासनाच्या सामाजिक न्याय विभागामार्फत चालविण्यात येणाऱ्या मागासवर्गीय मुलींच्या शासकीय वसतिगृह, चिंचणी (ता. कडेगाव, जि. सांगली) येथे शैक्षणिक वर्ष २०२६-२७ साठी प्रवेश प्रक्रिया सुरू झाली आहे.
इयत्ता ११ वी, १२ वी, पदवी, पदव्युत्तर तसेच विविध व्यावसायिक अभ्यासक्रमांमध्ये शिक्षण घेणाऱ्या मागासवर्गीय विद्यार्थिनींना ऑनलाइन पद्धतीने प्रवेश घेता येणार आहे. प्रवेशासाठी अर्ज https://hmasnew.mahait.org या संकेतस्थळावर उपलब्ध करण्यात आले आहेत.
वसतिगृहात विद्यार्थिनींसाठी मोफत निवास व भोजन व्यवस्था उपलब्ध असून, शालेय साहित्य, गणवेश तसेच शासनाकडून विविध आर्थिक सुविधाही दिल्या जातात. यामध्ये मासिक निर्वाह भत्ता, सहल खर्च, स्टेशनरी, प्रोजेक्टसाठी लागणारी मदत आणि गणवेशासाठी आर्थिक सहाय्य यांचा समावेश आहे.
ग्रामीण भागातील तसेच आर्थिकदृष्ट्या दुर्बल घटकांतील विद्यार्थिनींना शिक्षणाची संधी उपलब्ध करून देण्यासाठी ही योजना महत्त्वाची ठरत आहे. सुरक्षित निवास, शैक्षणिक वातावरण आणि शासनाच्या विविध सुविधा यामुळे अनेक विद्यार्थिनींना उच्च शिक्षण घेणे सुलभ होत आहे.
अधिकाधिक पात्र विद्यार्थिनींनी या योजनेचा लाभ घ्यावा, असे आवाहन वसतिगृह प्रशासनाच्या वतीने करण्यात आले आहे. तसेच ही माहिती विद्यार्थिनी व पालकांपर्यंत व्यापक प्रमाणात पोहोचविण्याचे आवाहनही करण्यात आले आहे.
