परतूर :
परतूर येथील किड्स वर्ल्ड इंग्लिश स्कूलच्या स्नेहसंमेलनातील कथित आक्षेपार्ह सादरीकरणाचा व्हिडिओ समोर आल्यानंतर या संपूर्ण प्रकरणाची सखोल चौकशी करून दोषींवर तात्काळ कठोर कारवाई करण्यात यावी, अशी मागणी आमदार बबनराव लोणीकर यांनी केली आहे.
याबाबत प्रसिद्धीस दिलेल्या निवेदनात आमदार लोणीकर यांनी म्हटले आहे की, शैक्षणिक संस्था विद्यार्थ्यांमध्ये राष्ट्रभक्ती, संविधानिक मूल्ये, सामाजिक सलोखा आणि सुसंस्कार रुजविण्याचे कार्य करतात. त्यामुळे अशा प्रकारच्या गंभीर स्वरूपाच्या आरोपांची निष्पक्ष चौकशी होणे अत्यंत आवश्यक आहे. चौकशीत जे कोणी दोषी आढळतील त्यांच्यावर कायद्यानुसार कठोर कारवाई करण्यात यावी.
या प्रकरणात आपण मुख्यमंत्री देवेंद्र फडणवीस, शिक्षण विभाग तसेच जिल्हा प्रशासनाकडे हस्तक्षेप करून तातडीने कारवाई करण्याची मागणी केली असल्याचेही त्यांनी स्पष्ट केले.
“राज्यातील कोणत्याही शैक्षणिक संस्थेत राष्ट्रविरोधी, हिंसाचाराला प्रोत्साहन देणाऱ्या किंवा समाजात तेढ निर्माण करणाऱ्या बाबींना थारा दिला जाऊ नये, हीच माझी ठाम भूमिका आहे,” असे आमदार बबनराव लोणीकर यांनी नमूद केले.
दरम्यान, या प्रकरणामुळे परतूर परिसरात तसेच राज्यभरात विविध स्तरांतून तीव्र प्रतिक्रिया उमटत असून, संबंधित व्हिडिओ आणि कार्यक्रमाबाबत प्रशासन कोणती भूमिका घेते याकडे सर्वांचे लक्ष लागले आहे.
