सावली प्रतिनिधी : ग्रामीण रुग्णालय सावली येथे दिनांक 18 जून 2026 रोजी दुपारी 12 वाजता ज्येष्ठ नागरिकांसाठी कायदे विषयक मार्गदर्शन कार्यक्रमाचे आयोजन करण्यात आले होते. “सिनिअर सिटीझन ज्येष्ठ नागरिक कायदा” या विषयावर आयोजित या कार्यक्रमाला ज्येष्ठ नागरिकांनी उत्स्फूर्त प्रतिसाद दिला.
या कार्यक्रमात जिल्हा विधी सेवा प्राधिकरण, चंद्रपूर तसेच विधी सेवा समिती सावली यांच्या वतीने विधी स्वयंसेवक श्री. षडाकांत एम. कवठे यांनी उपस्थितांना सविस्तर मार्गदर्शन केले. त्यांनी महाराष्ट्र शासनामार्फत ज्येष्ठ नागरिकांना मिळणाऱ्या विविध सुविधा, शासकीय योजना आणि कायदेशीर हक्कांची माहिती दिली.
मार्गदर्शन करताना ज्येष्ठ नागरिकांसाठी उपलब्ध औषधोपचार सुविधा, शासनाकडून दिले जाणारे मासिक अनुदान, तसेच प्रधानमंत्री आयुष्यमान भारत योजना याविषयी सविस्तर माहिती देण्यात आली. याशिवाय ज्येष्ठ नागरिकांच्या हक्कांचे संरक्षण आणि कायदेशीर मदत मिळविण्याच्या प्रक्रियेबाबतही माहिती देण्यात आली.
कार्यक्रमाला ग्रामीण रुग्णालयाचे मेडिकल ऑफिसर श्री. बागडे साहेब, कर्मचारी वर्ग, रुग्ण तसेच परिसरातील ज्येष्ठ नागरिक मोठ्या संख्येने उपस्थित होते. उपस्थितांनी कार्यक्रमाचे कौतुक करत अशा मार्गदर्शन शिबिरांची आवश्यकता व्यक्त केली.
