खंडाळा प्रतिनिधी
पुणे येथील हिंजवडी परिसरात उघडकीस आलेल्या एमडी ड्रग्ज प्रकरणाचे कनेक्शन आता सातारा जिल्ह्यातील खंडाळा तालुक्यापर्यंत पोहोचले असून, या प्रकरणात अहिरे गावचे माजी उपसरपंच व विद्यमान ग्रामपंचायत सदस्य आरोपी असल्याचे समोर आल्याने परिसरात मोठी खळबळ उडाली आहे.
अमली पदार्थ विरोधी पथक, पिंपरी-चिंचवड पुणे आणि खंडाळा पोलिसांनी संयुक्त कारवाई करत आरोपींच्या खंडाळ्यातील घरावर धाड टाकली. या कारवाईदरम्यान पोलिसांनी सुमारे 28.44 ग्रॅम एमडी ड्रग्ज जप्त केले असून त्याची किंमत अंदाजे 2 लाख 84 हजार 400 रुपये असल्याचे सांगण्यात आले.
या प्रकरणी खंडाळा पोलिसांनी अक्षय प्रदीप धायगुडे, दयानंद उत्तम धायगुडे, महेश पुनाराम किचड उर्फ बिश्नोई, अश्फाक उर्फ मोन्या काझी (सर्व रा. अहिरे, ता. खंडाळा) तसेच हनुमान किलेरी उर्फ बिश्नोई (सध्या रा. खंडाळा) यांच्यासह अन्य आरोपींवर गुन्हा दाखल केला आहे.
पोलिसांनी दिलेल्या माहितीनुसार, गुरुवार दि. 11 जून 2026 रोजी पुणे जिल्ह्यातील हिंजवडी येथील मुक्ताईनगर परिसरात एमडी ड्रग्ज विक्रीसाठी आणण्यात आले होते. यावेळी पोलिसांनी सापळा रचून अक्षय प्रदीप धायगुडे (वय 31), दयानंद उत्तम धायगुडे (वय 38) आणि महेश पुनाराम किचड उर्फ बिश्नोई (वय 21) या तिघांना ताब्यात घेतले.
त्यांच्याकडून 61.70 ग्रॅम एमडी ड्रग्ज, तीन मोबाईल फोन आणि एक चारचाकी वाहन असा एकूण 11 लाख 55 हजार 500 रुपयांचा मुद्देमाल जप्त करण्यात आला आहे.
ताब्यातील आरोपींकडे कसून चौकशी केली असता अश्फाक उर्फ मोन्या काझी आणि हनुमान किलेरी उर्फ बिश्नोई यांची नावे समोर आली. हे दोघे सध्या फरार असून पोलीस त्यांचा शोध घेत आहेत. या प्रकरणाचा अधिक सखोल तपास सुरू असून आणखी काही धक्कादायक बाबी समोर येण्याची शक्यता व्यक्त केली जात आहे.
माजी उपसरपंचच आरोपी असल्याने खळबळ
या प्रकरणातील आरोपी दयानंद उत्तम धायगुडे हा अहिरे गावचा माजी उपसरपंच तसेच विद्यमान ग्रामपंचायत सदस्य असल्याचे उघड झाल्याने ग्रामस्थांमध्ये संताप व्यक्त केला जात आहे. लोकप्रतिनिधीवरच अमली पदार्थ प्रकरणात गुन्हा दाखल झाल्यामुळे संपूर्ण खंडाळा तालुक्यात चर्चेला उधाण आले आहे.
