नाशिक | प्रतिनिधी
कष्ट, जिद्द आणि प्रामाणिकपणाची जोड मिळाली की कोणतीही कठीण परिस्थिती यशाच्या आड येऊ शकत नाही, हे म्हाळसाकोरे येथील तरुण कु. अल्कबीर आसिफ पठाण याने आपल्या यशातून सिद्ध करून दाखवले आहे. नुकत्याच जाहीर झालेल्या अत्यंत कठीण समजल्या जाणाऱ्या सीए (चार्टर्ड अकाउंटंट) परीक्षेत अल्कबीर याने प्रथम श्रेणीत घवघवीत यश संपादन केले आहे. त्याच्या या उल्लेखनीय यशामुळे संपूर्ण पंचक्रोशीत आनंदाचे वातावरण निर्माण झाले असून सर्व स्तरांतून त्याच्यावर अभिनंदनाचा वर्षाव होत आहे.
अल्कबीरचे वडील श्री. आसिफभाई पठाण हे भारतीय डाक विभागात पोस्टमन म्हणून कार्यरत आहेत. अत्यंत प्रतिकूल आर्थिक परिस्थितीतही त्यांनी प्रामाणिकपणा आणि मेहनतीच्या जोरावर कुटुंबाची जबाबदारी समर्थपणे सांभाळली. गावात मेहनती आणि सुसंस्कृत कुटुंब म्हणून पठाण परिवाराची ओळख असून, त्याच संस्कारांची प्रेरणा घेत अल्कबीरने शिक्षणाच्या क्षेत्रात मोठी कामगिरी करून दाखवली आहे.
अनेक अडचणी आणि मर्यादा असतानाही अल्कबीरने खचून न जाता सातत्याने अभ्यास केला. कठोर परिश्रम, आत्मविश्वास आणि चिकाटीच्या बळावर त्याने सीएसारख्या कठीण परीक्षेत प्रथम श्रेणीत यश मिळवत गावाचे नाव उज्ज्वल केले आहे.
अल्कबीरच्या या यशाबद्दल शिक्षक, मित्रपरिवार, सामाजिक कार्यकर्ते तसेच ग्रामस्थांकडून त्याचे विशेष कौतुक करण्यात येत आहे. “हे यश केवळ पठाण कुटुंबाचे नसून संपूर्ण गाव आणि पंचक्रोशीसाठी अभिमानाची बाब आहे,” अशा भावना नागरिकांकडून व्यक्त होत आहेत.
ग्रामीण भागातील विद्यार्थ्यांसाठी अल्कबीर पठाण हा प्रेरणादायी आदर्श ठरला असून, जिद्द आणि मेहनतीच्या जोरावर कोणतेही ध्येय गाठता येते, याचे तो जिवंत उदाहरण बनला आहे.
