मुंबई | प्रतिनिधी
सामाजिक बांधिलकी जपत समाजसेवा, पर्यावरण संवर्धन, धार्मिक उपक्रम तसेच जनहिताच्या विविध प्रश्नांवर सातत्याने कार्य करणारे लायन हार्ट ग्रुप, नवी मुंबईचे सामाजिक कार्यकर्ते विरेंद्र यशवंत म्हात्रे यांना त्यांच्या उल्लेखनीय योगदानाची दखल घेत प्रतिष्ठेचा ‘राष्ट्रीय कार्य दर्पण सन्मान पुरस्कार-२०२६’ प्रदान करण्यात आला. महाराष्ट्र लोक कल्याणकारी सेवा संस्थेच्या वतीने मुंबई येथे आयोजित करण्यात आलेल्या दर्पण गौरव संमेलनात हा पुरस्कार देऊन त्यांचा गौरव करण्यात आला.
मुंबईतील मराठी पत्रकार भवन येथे संपन्न झालेल्या या भव्य सोहळ्यात प्रसिद्ध कोळी नटसम्राट राजेश खर्डे वेसावकर यांच्या हस्ते विरेंद्र यशवंत म्हात्रे यांना सन्मानचिन्ह व प्रमाणपत्र प्रदान करण्यात आले. यावेळी आयकर विभागाचे प्रमुख अतिरिक्त आयुक्त सुनील अगवणे, ख्यातनाम संगीतकार कौशल इनामदार, डॉ. अमजद खान पठाण, डॉ. पूर्णिमा सुर्वे, डॉ. जे. के. महाडिक, उत्तम तरकसे, सायली पावसकर, सलमा खान, एन. डी. खान यांच्यासह विविध क्षेत्रातील मान्यवर उपस्थित होते.
विरेंद्र यशवंत म्हात्रे हे गेल्या अनेक वर्षांपासून सामाजिक, शैक्षणिक, धार्मिक आणि पर्यावरण क्षेत्रात निस्वार्थ भावनेने कार्यरत आहेत. विविध सामाजिक उपक्रम, गरजूंना मदत, पर्यावरण संवर्धन मोहिमा, रक्तदान शिबिरे, जनजागृती अभियान तसेच समाजहिताच्या अनेक कार्यांमध्ये त्यांनी सक्रिय सहभाग घेतला आहे. विशेष म्हणजे, कोणत्याही शासकीय अनुदानाची अथवा वर्गणीची अपेक्षा न ठेवता स्वतःच्या खर्चातून विविध समाजोपयोगी उपक्रम राबवून त्यांनी समाजसेवेचा आदर्श निर्माण केला आहे.
त्यांच्या या समर्पित आणि सातत्यपूर्ण कार्याची राष्ट्रीय स्तरावर दखल घेत ‘राष्ट्रीय कार्य दर्पण सन्मान पुरस्कार-२०२६’ देऊन गौरव करण्यात आला. या सन्मानामुळे नवी मुंबईसह विविध स्तरांतून त्यांच्यावर अभिनंदनाचा वर्षाव होत असून सामाजिक क्षेत्रातील त्यांच्या योगदानाबद्दल सर्वत्र कौतुक व्यक्त करण्यात येत आहे.
कार्यक्रमादरम्यान उपस्थित मान्यवरांनी विरेंद्र म्हात्रे यांच्या कार्याचे कौतुक करत समाजासाठी अशा कार्यकर्त्यांची गरज असल्याचे मत व्यक्त केले. समाजसेवेच्या माध्यमातून सकारात्मक बदल घडवून आणण्याचा त्यांचा प्रयत्न अनेकांसाठी प्रेरणादायी असल्याची भावना यावेळी व्यक्त करण्यात आली.
