‘मॅलिग्नंट फायलॉइड्स ट्यूमर’वर यशस्वी उपचार; गरीब रुग्णांसाठी दिलासा
जालना | दि. १८
जिल्हा सामान्य रुग्णालय आणि शासकीय वैद्यकीय महाविद्यालयाच्या संयुक्त प्रयत्नांना मोठे यश मिळाले असून, रुग्णालयाच्या इतिहासात प्रथमच स्तनांच्या कर्करोगावरील अत्यंत प्रगत आणि गुंतागुंतीची शस्त्रक्रिया यशस्वीपणे पार पडली आहे. या ऐतिहासिक यशामुळे जालना जिल्हा रुग्णालयाच्या आरोग्य सेवेच्या गुणवत्तेत महत्त्वपूर्ण भर पडली आहे.
जिल्हा रुग्णालयातील ऑन्को-सर्जन (कर्करोग तज्ज्ञ) डॉ. अब्दुल राफे आणि त्यांच्या वैद्यकीय पथकाने एका महिला रुग्णावर ‘मॅलिग्नंट फायलॉइड्स ट्यूमर’ या दुर्मिळ प्रकारच्या स्तनाच्या कर्करोगासाठी ‘मॉडिफाइड रॅडिकल मॅस्टेक्टॉमी’ ही अत्यंत क्लिष्ट शस्त्रक्रिया यशस्वीरीत्या पूर्ण केली.
यापूर्वी जिल्ह्यातील सर्वसामान्य व आर्थिकदृष्ट्या दुर्बल रुग्णांना स्तनांच्या कर्करोगावरील उपचारांसाठी छत्रपती संभाजीनगर किंवा इतर मोठ्या शहरांतील खासगी रुग्णालयांमध्ये जावे लागत होते. त्यामुळे लाखो रुपयांचा खर्च सहन करावा लागत होता. मात्र, आता ही अत्याधुनिक शस्त्रक्रिया जिल्हा रुग्णालयातच यशस्वी झाल्याने स्थानिक स्तरावर मोफत व तज्ज्ञ उपचार उपलब्ध होण्याचा मार्ग मोकळा झाला आहे.
या यशस्वी शस्त्रक्रियेमुळे जिल्हा सामान्य रुग्णालयाची पायाभूत सुविधा आणि उपलब्ध मनुष्यबळ कर्करोगासारख्या गंभीर व क्लिष्ट आजारांवरील उपचार करण्यास सक्षम असल्याचे स्पष्ट झाले आहे.
या उल्लेखनीय कामगिरीबद्दल जिल्हा शल्य चिकित्सक डॉ. राजेंद्र पाटील यांनी डॉ. अब्दुल राफे, भूलतज्ज्ञ, शस्त्रक्रिया विभागातील कर्मचारी तसेच परिचारिकांचे अभिनंदन केले. सर्वसामान्य नागरिकांना सर्वोत्तम आरोग्य सेवा उपलब्ध करून देण्यासाठी रुग्णालय प्रशासन कटिबद्ध असल्याचे त्यांनी सांगितले.
