वर्धा प्रतिनिधी :
वडनेर पोलीस स्टेशनमध्ये नोंद असलेल्या अल्पवयीन मुलीच्या अपहरण प्रकरणाचा अखेर वर्षभरानंतर उलगडा करण्यात पोलिसांना यश आले आहे. अनैतिक मानवी वाहतूक प्रतिबंधक कक्ष आणि स्थानिक गुन्हे शाखेच्या संयुक्त कारवाईत आरोपीला उत्तर प्रदेशातील प्रयागराज जिल्ह्यातील मौजा खाखोपुर येथून शिताफीने ताब्यात घेण्यात आले असून पीडित मुलीची सुखरूप सुटका करण्यात आली आहे.
याबाबत पोलिसांनी दिलेल्या माहितीनुसार, फिर्यादीने ११ एप्रिल २०२५ रोजी वडनेर पोलीस स्टेशनमध्ये तक्रार दाखल केली होती की, त्यांची १७ वर्षीय अल्पवयीन मुलगी हिला एका अज्ञात इसमाने फूस लावून पळवून नेले. या तक्रारीवरून पोलीस स्टेशन वडनेर येथे अप. क्र. १३७/२०२५ कलम १३७(२) बीएनएस अंतर्गत गुन्हा दाखल करण्यात आला होता.
तपासादरम्यान आरोपी आणि पीडित मुलीचा शोध लागत नसल्याने गुन्ह्यात पुढे कलम १४३(४) बीएनएसची वाढ करण्यात आली होती. त्यानंतर हा गुन्हा अनैतिक मानवी वाहतूक प्रतिबंधक कक्षाकडे वर्ग करण्यात आला.
मा. पोलीस अधीक्षक सौरभ कुमार अग्रवाल यांच्या विशेष सूचनांनुसार स्थानिक गुन्हे शाखा व अनैतिक मानवी वाहतूक प्रतिबंधक कक्षाने तपास सुरू केला. तांत्रिक माहिती, गुप्त बातमीदार आणि विविध माध्यमांतून माहिती संकलित करण्यात आली. त्यानुसार आरोपी आणि पीडित मुलगी हे उत्तर प्रदेशातील प्रयागराज जिल्ह्यातील मौजा खाखोपुर येथे राहत असल्याची माहिती पोलिसांना मिळाली.
यानंतर पोलिसांच्या पथकाने तेथे जाऊन सापळा रचत आरोपी सौरभ भास्कर गगनाईक (वय २२, रा. घुग्गूस, जि. चंद्रपूर) याला ताब्यात घेतले. तसेच अल्पवयीन पीडित मुलीची सुटका करून तिला तिच्या पालकांच्या स्वाधीन करण्यात आले. आरोपीला कायदेशीर प्रक्रियेनुसार अटक करण्यात आली असून पुढील तपास वडनेर पोलीस करीत आहेत.
ही कारवाई पोलीस अधीक्षक सौरभ कुमार अग्रवाल, अपर पोलीस अधीक्षक सदाशिव वाघमारे यांच्या मार्गदर्शनाखाली पोलीस निरीक्षक विनोद चौधरी यांच्या नेतृत्वात करण्यात आली. कारवाईत स.फौ. सुभाष राऊत, दिवाकर परिमळ, पो.हवा. अमर लाखे, नितेश मेश्राम, संजयसिंग सूर्यवंशी, संजय राठोड, चंद्रकांत बुरंगे, नवनाथ मुंडे, म.पो.हवा. शबाना शेख तसेच सायबर सेलचे पो.हवा. अक्षय राऊत आणि गोविंद मुंडे यांनी सहभाग घेतला.
