सेलू प्रतिनिधी :
सेलू तालुक्यातील खापरी गावात एका घरात शिरलेल्या सुमारे ४ फूट लांबीच्या विषारी नागाला सर्पमित्र पप्पू कांबळे यांनी सुरक्षितरीत्या पकडून जीवदान दिल्याची घटना घडली. या घटनेमुळे गावात काही काळ भीतीचे वातावरण निर्माण झाले होते.
मिळालेल्या माहितीनुसार, खापरी येथील मोरेश्वर वासकर यांच्या घरी रात्री कुटुंबीय जेवण आटोपून झोपेची तयारी करत होते. दरम्यान, रात्री सुमारे १२.३० वाजताच्या सुमारास त्यांच्या मुलाने घराबाहेर येताच दरवाजाजवळ मोठा नाग पाहिला. नागाने त्याच्यावर झेप घेण्याचा प्रयत्न केल्याने त्याने तत्काळ आरडाओरडा केला. आवाज ऐकून कुटुंबीय बाहेर आले असता त्यांनाही मोठा विषारी नाग दिसून आला.
दरम्यान, नाग घरात शिरून गॅस सिलेंडर व शेगडीखाली जाऊन बसल्याने परिसरातील नागरिकांमध्ये भीतीचे वातावरण निर्माण झाले. यावेळी गावातील योगेश चापडे यांनी तत्काळ सेलू येथील सर्पमित्र पप्पू कांबळे यांच्याशी संपर्क साधून घटनेची माहिती दिली.
माहिती मिळताच सर्पमित्र पप्पू कांबळे यांनी कोणताही विलंब न करता खापरी गाव गाठले. त्यांनी अत्यंत कौशल्याने आणि सावधगिरी बाळगत नागाला सुरक्षितरीत्या पकडून आपल्या ताब्यात घेतले. यावेळी त्यांनी उपस्थित ग्रामस्थांना सापांबाबत जनजागृती करत, साप आढळल्यास घाबरून न जाता त्याला इजा न करता तज्ज्ञांना संपर्क करण्याचे आवाहन केले.
सर्पमित्रांच्या या धाडसी आणि तत्पर कार्यामुळे संभाव्य अनर्थ टळला असून एका विषारी नागाचेही प्राण वाचले. ग्रामस्थांनी सर्पमित्र पप्पू कांबळे तसेच योगेश चापडे यांचे आभार व्यक्त केले.
