जालना प्रतिनिधी :
परतूर तालुक्यातील किड्स वर्ल्ड इंग्लिश स्कूलच्या वार्षिक स्नेहसंमेलनातील कथित आक्षेपार्ह सादरीकरणाचा व्हिडिओ सोशल मीडियावर व्हायरल झाल्यानंतर या प्रकरणात संबंधित शाळेचे संचालक, प्राचार्य, शिक्षक व कर्मचाऱ्यांवर कायदेशीर कारवाई करण्यात यावी, अशी मागणी सकल हिंदू समाजाच्या वतीने जिल्हा पोलीस अधीक्षकांकडे निवेदनाद्वारे करण्यात आली आहे.
निवेदनानुसार, शाळेच्या वार्षिक स्नेहसंमेलनादरम्यान काही विद्यार्थिनींनी हातात तलवारी घेऊन तसेच विशिष्ट पोशाख परिधान करून एका गाण्यावर नृत्य सादर केले. या गाण्यातील शब्द देशविघातक स्वरूपाचे असल्याचा आरोप करण्यात आला आहे. तसेच कार्यक्रमादरम्यान मंचावरील स्क्रीनवर दहशतवादी म्हणून ओळखल्या जाणाऱ्या मुमताज कादरी याचे छायाचित्र, आयएसआयएसशी संबंधित असल्याचा दावा करण्यात आलेले पोस्टर तसेच पाकिस्तानच्या राष्ट्रीय ध्वजासारखा दिसणारा ध्वज दाखविण्यात आल्याचा आरोप निवेदनात करण्यात आला आहे.
लहान मुलांचा वापर करून अतिरेकी विचारसरणीचे उदात्तीकरण करण्यात आल्याचा आरोप करत संबंधितांवर तातडीने गुन्हा दाखल करून सखोल चौकशी करण्यात यावी, अशी मागणी सकल हिंदू समाजाने केली आहे. शाळा ही विद्यार्थ्यांमध्ये राष्ट्रप्रेम, संविधानिक मूल्ये आणि सामाजिक जबाबदारीची भावना रुजविण्याचे केंद्र असताना अशा प्रकारचे कार्यक्रम आयोजित करणे गंभीर बाब असल्याचेही निवेदनात नमूद करण्यात आले आहे.
या प्रकरणामुळे जिल्ह्यात खळबळ उडाली असून पोलीस प्रशासन या प्रकरणात कोणती भूमिका घेते याकडे नागरिकांचे लक्ष लागले आहे. मात्र, निवेदनातील आरोपांची अधिकृत पडताळणी अद्याप झालेली नसून संबंधित यंत्रणांकडून चौकशी होणे बाकी आहे.
