शहादा, दि. 20 (का.प्र.) :
स्थानिक जिल्हा परिषद केंद्रशाळा डोंगरगाव येथे माता-पालक संघाची सहविचार सभा उत्साहपूर्ण वातावरणात पार पडली. शाळेच्या वतीने आयोजित करण्यात आलेल्या या विशेष सभेच्या अध्यक्षस्थानी मुख्याध्यापक राजेंद्र पाटील होते. सभेला गावातील माता-भगिनी आणि पालकांची मोठ्या संख्येने उपस्थिती लाभली.
सभेदरम्यान पालकांना विद्यार्थ्यांच्या शिक्षण, आरोग्य आणि सर्वांगीण विकासाविषयी विविध शिक्षकांनी मार्गदर्शन केले. विषयतज्ज्ञ राजेंद्र धनगर यांनी शासनाच्या विविध शालेय योजना, विद्यार्थ्यांना मिळणाऱ्या सुविधा आणि शैक्षणिक उपक्रमांची माहिती दिली.
ज्येष्ठ शिक्षिका सुनंदा निकवाडे यांनी मुलांच्या जडणघडणीत पालकांचा सहभाग किती महत्त्वाचा आहे, हे स्पष्ट केले. जयश्री महाजन यांनी विद्यार्थ्यांच्या नियमित उपस्थितीवर भर देत पाल्यांना दररोज शाळेत पाठविण्याचे आवाहन केले.
बिंदा पावरा यांनी विद्यार्थ्यांची वैयक्तिक स्वच्छता, आरोग्य आणि परिसर स्वच्छतेबाबत मातांना महत्त्वपूर्ण मार्गदर्शन केले. तसेच शाळेची शंभर टक्के पटनोंदणी पूर्ण व्हावी यासाठी सुर्याताई फड यांनी पालकांकडून सहकार्याची अपेक्षा व्यक्त केली.
या सभेत पालकांनी विविध शालेय विषयांवर शिक्षकांशी सविस्तर चर्चा करत शाळेच्या गुणवत्तावाढीसाठी नेहमी सहकार्य करण्याचा निर्धार व्यक्त केला.
कार्यक्रमाचे नियोजन वंदना कोळी यांनी केले. पालकांचा उत्स्फूर्त सहभाग आणि शाळेबद्दलची सकारात्मक भावना यामुळे ही सहविचार सभा यशस्वी ठरली. कार्यक्रमाच्या शेवटी उपस्थितांचे आभार मानण्यात आले.
