शहादा, दि. २० (का.प्र.) :
मध्य प्रदेश मार्गे हरियाणातून गुजरात राज्याकडे विदेशी दारूची मोठी खेप घेऊन जाणारा दहा चाकी कंटेनर शहादा पोलिसांनी शिताफीने पकडला आहे. शहादा पोलीस निरीक्षक हेमंतकुमार पाटील आणि गुन्हे शोध पथकाने प्रकाशा गावाजवळ सापळा रचून ही धडक कारवाई केली. या कारवाईत ६५ लाख २९ हजार २०० रुपये किमतीचा विदेशी दारूचा साठा आणि २५ लाख रुपये किमतीचा कंटेनर असा एकूण ९० लाख २९ हजार २०० रुपयांचा मुद्देमाल जप्त करण्यात आला आहे.
पोलिसांना मिळालेल्या गुप्त माहितीनुसार, हरियाणा राज्यातून विदेशी दारूने भरलेला एक दहा चाकी कंटेनर शहादा-प्रकाशा मार्गे गुजरातच्या दिशेने जाणार होता. या माहितीच्या आधारे शहादा डीबी पथकाने शुक्रवारी सायंकाळी ६ वाजेच्या सुमारास प्रकाशा परिसरातील वैजाली रस्त्यावरून येणाऱ्या अशोक लेलँड कंटेनर क्रमांक RG 32 GC 0812 ला अडवले.
पोलिसांनी चालकाकडे चौकशी केली असता, त्याने कंटेनरमध्ये घरगुती सामान असल्याचा बनाव केला. मात्र त्याचा संशयास्पद वावर पाहून पोलिसांनी वाहनाची तपासणी केली. यावेळी चालक व वाहक घाबरले आणि वाहनात अवैध विदेशी दारू असल्याची कबुली दिली. त्यानंतर सदर वाहन शहादा पोलीस ठाण्यात आणण्यात आले.
रात्री उशिरा कंटेनरमधील बॉक्स उतरवून तपासणी केली असता, त्यात नामांकित कंपन्यांच्या विदेशी दारूचा मोठा साठा आढळून आला. पोलिसांनी वाहनासह मुद्देमाल जप्त करून चालक आणि वाहकाला ताब्यात घेतले आहे. आरोपींविरुद्ध महाराष्ट्र दारूबंदी कायद्यानुसार गुन्हा दाखल करण्याची प्रक्रिया सुरू करण्यात आली आहे.
ही कारवाई नंदुरबार जिल्हा पोलीस अधीक्षक अश्विनी सानप यांच्या मार्गदर्शनाखाली शहादा पोलीस ठाण्याचे पोलीस निरीक्षक हेमंतकुमार पाटील यांच्या नेतृत्वाखाली करण्यात आली. या कारवाईत एपीआय संदीप वाघ, एएसआय चंद्रकांत देसले, पोलीस हवालदार दीपक चौधरी, पोलीस शिपाई भगवान सावळे आणि कपिल मंदिल यांनी सहभाग घेतला.
या मोठ्या कारवाईमुळे नंदुरबार जिल्ह्यातून गुजरातकडे होणाऱ्या अवैध दारू तस्करीला मोठा आळा बसला असून नागरिकांमधून पोलिसांचे कौतुक होत आहे. तसेच या मार्गावर अवैध गुटखा वाहतुकीचाही संशय व्यक्त होत असून याप्रकरणीही कठोर कारवाई करण्याची मागणी नागरिकांकडून केली जात आहे.
