उरण प्रतिनिधी
उरण ते शिर्डी श्री साईबाबांच्या मानाच्या पहिल्या पालखीच्या २६ व्या वर्षाची सुरुवात यंदा धार्मिकतेसोबतच समाजसेवेच्या उपक्रमांनी उत्साहात करण्यात आली. हनुमान कोळीवाडा, उरण येथे आयोजित करण्यात आलेल्या मोफत आरोग्य तपासणी व मोफत डोळे तपासणी शिबिराला नागरिक आणि साई भक्तांचा उत्स्फूर्त प्रतिसाद लाभला.
गेल्या २५ वर्षांपासून अखंडपणे सुरू असलेल्या या मानाच्या पालखीने यंदा रौप्यमहोत्सवी वर्ष पूर्ण करून २६ व्या वर्षात पदार्पण केले आहे. या निमित्ताने श्रद्धा, सेवा आणि सामाजिक बांधिलकी यांचा सुंदर संगम पाहायला मिळाला.
“आरोग्य हेच खरे दैवत” या संकल्पनेतून आयोजित करण्यात आलेल्या शिबिरात तज्ज्ञ डॉक्टरांच्या उपस्थितीत रक्तदाब, मधुमेह, हृदयविकार तसेच सर्वसाधारण आरोग्य तपासणी करण्यात आली. त्याचबरोबर नेत्ररोग तज्ज्ञांकडून मोफत डोळे तपासणी करून गरजू नागरिकांना मोफत चष्मे आणि आवश्यक औषधांचे वाटप करण्यात आले.
सकाळपासूनच हनुमान कोळीवाडा परिसरात नागरिकांची मोठी गर्दी पाहायला मिळाली. ज्येष्ठ नागरिक, महिला, युवक आणि लहान मुलांनीही या उपक्रमाचा लाभ घेतला. भजन-कीर्तनाच्या गजरात आणि धार्मिक वातावरणात हा संपूर्ण कार्यक्रम अत्यंत शिस्तबद्ध व उत्साहपूर्ण वातावरणात पार पडला.
पालखी सोहळ्याच्या आयोजकांनी सांगितले की, “साईबाबांची खरी सेवा म्हणजे गरजूंची सेवा. धार्मिक परंपरा जपत समाजोपयोगी उपक्रम राबविण्याचा आमचा प्रयत्न पुढेही कायम राहील.”
या सेवाभावी उपक्रमामुळे उरण परिसरातील अनेक नागरिकांना मोफत वैद्यकीय मार्गदर्शन व आरोग्य सेवा मिळाली. त्यामुळे पालखीच्या २६ व्या वर्षाची सुरुवात खऱ्या अर्थाने समाजसेवेच्या माध्यमातून झाल्याची भावना उपस्थितांनी व्यक्त केली.
कार्यक्रम यशस्वी करण्यासाठी मंडळाचे सर्व पदाधिकारी आणि साई पदयात्री यांनी विशेष मेहनत घेतली. तसेच उपस्थित मान्यवरांचा यावेळी सन्मान करण्यात आला.
