जामनेर | प्रतिनिधी :
जामनेर येथील लिटिल फ्लॉवर्स इंग्लिश मीडियम स्कूलमध्ये २१ जून रोजी जागतिक योग दिन उत्साहपूर्ण वातावरणात साजरा करण्यात आला. विद्यार्थ्यांनी विविध योगासने आणि प्राणायामाचे प्रात्यक्षिक सादर करून योगाचे महत्त्व अधोरेखित केले.
कार्यक्रमाच्या प्रारंभी विद्यार्थ्यांना योगाचे शारीरिक व मानसिक आरोग्यासाठी असलेले महत्त्व समजावून सांगण्यात आले. त्यानंतर विद्यार्थ्यांनी ताडासन, वृक्षासन, भुजंगासन, वज्रासन तसेच विविध प्राणायाम प्रकारांचे प्रभावी सादरीकरण केले. विद्यार्थ्यांचा उत्साह आणि सहभाग विशेष उल्लेखनीय ठरला.
यावेळी शाळेचे क्रीडाशिक्षक श्री. योगेश धुंडाळे सर आणि श्रीमती सोनाली तिवारी यांनी योगशिक्षक म्हणून मार्गदर्शन केले. तसेच शाळेच्या मुख्याध्यापिका श्रीमती रंजना आमोदे यांनी विद्यार्थ्यांना संबोधित करत “करो योग, रहो निरोग” या संदेशाचे महत्त्व पटवून दिले.
योगामुळे शरीर निरोगी राहते, मन एकाग्र होते आणि जीवनशैली सकारात्मक बनते, असे सांगत त्यांनी विद्यार्थ्यांना नियमित योगाभ्यास करण्याचे आवाहन केले. कार्यक्रमाच्या शेवटी सर्व विद्यार्थ्यांनी नियमित योग करण्याचा संकल्प केला.
कार्यक्रमाच्या यशस्वी आयोजनासाठी शिक्षक व शिक्षकेतर कर्मचाऱ्यांनी विशेष परिश्रम घेतले.
