कुरुंदवाड | प्रतिनिधी :
शिरोळ तालुक्यातील दत्तवाड येथे एका युवकाने गळफास घेऊन आत्महत्या केल्याची दुर्दैवी घटना घडली आहे. प्रतीक कुमार पाटील (वय २८, रा. खंडोबा मंदिराजवळ, दत्तवाड) असे मृत युवकाचे नाव आहे.
याबाबतची माहिती अशी की, रविवार दि. २१ जून रोजी सकाळी आठ वाजण्यापूर्वी प्रतीक पाटील यांनी आपल्या राहत्या घरात लाकडी वाशाला दोरीच्या सहाय्याने गळफास घेत आत्महत्या केली. घटनेवेळी ते मद्यधुंद अवस्थेत असल्याचे प्राथमिक माहितीतून समोर आले आहे.
या घटनेची माहिती मयताचा चुलत भाऊ संदीप मलगोंडा पाटील (रा. महावीर नगर, दत्तवाड) यांनी कुरुंदवाड पोलीस ठाण्यात दिली. पोलिसांनी घटनास्थळी पंचनामा करून मृतदेह शवविच्छेदनासाठी जिल्हा परिषद दवाखान्यात पाठवला. शवविच्छेदनानंतर मृतदेह नातेवाईकांच्या ताब्यात देण्यात आला.
मृत प्रतीक पाटील यांच्या पश्चात आई-वडील असा परिवार असून घरची परिस्थिती बेताची असल्याचे सांगण्यात आले. आत्महत्येचे नेमके कारण अद्याप समजू शकले नसून पोलीस अधिक तपास करीत आहेत.
या प्रकरणाचा पुढील तपास पोलीस हेड कॉन्स्टेबल कराडे करीत आहेत.
