कुरुंदवाड | प्रतिनिधी :
कुरुंदवाड शहरासह भैरववाडी परिसरात मोहरम निमित्त रविवारी अत्यंत भक्तिमय वातावरणात विविध पीर-पंजांची प्रतिष्ठापना करण्यात आली. शहरातील कुडेखान, दर्गाह परिसरातील बडेनालसाहेब तसेच अठरा मशिदींसह दोन मंदिरांमध्ये पारंपरिक धार्मिक विधींनी पीर-पंजांची स्थापना करण्यात आली.
शनिवारी सायंकाळी हजरत दौलतशाह वली दर्गाह येथे शहरातील कुडेखान व बडेनालसाहेबांच्या पीर-पंजांचा नाल व छत्री विधी मोठ्या उत्साहात पार पडला. त्यानंतर रविवार आणि सोमवारी शहरातील झारी पीर, बारगिर पीर, गोदड पीर, भैरववाडी पीर, ढाल पीर, म्हतापे पीर, मुजावर पीर, गैबी पीर, बैरागदार पीर, बागवान पीर, मोमीन पीर, कुडेखान पीर, कारखाना पीर, ढेपणपूर पीर, खाटीक पीर, बट्टे पीर, एकता पीर, शेळके पीर तसेच फकिरवाडा मौलाअली पीर यांची प्रतिष्ठापना करण्यात आली.
याशिवाय शहरातील काही मंदिरांमध्येही परंपरेनुसार धनगर समाज बांधवांकडून भैरववाडीतील श्री बिरदेव मंदिर आणि पंत बाळेकुंद्री महाराज मंदिरात पीर-पंजांची स्थापना करण्यात आली. यामुळे परिसरात हिंदू-मुस्लिम ऐक्याचे दर्शन घडले.
मोहरमच्या सातव्या दिवशी मंगळवारी नऊ पीरांच्या भेटी होणार असून आठव्या दिवशी बुधवारी आणखी नऊ पीरांच्या भेटी पार पडणार आहेत. गुरुवारी ‘खत्तल रात्र’ निमित्त सर्व मशिदींमध्ये पान-सुपारीचा कार्यक्रम आयोजित करण्यात आला असून रात्री उशिरा पारंपरिक अग्निकुंड (खाई उधळणे) सोहळा होणार आहे.
शुक्रवारी दहावी निमित्त सकाळी सात वाजल्यापासून मुख्य विसर्जन भेटी व घरोघरी दर्शन कार्यक्रम होणार असून रात्री उशिरा पीर विसर्जन करण्यात येणार आहे.
या धार्मिक कार्यक्रमात रमजान पकाली, बापूसाहेब आसंगे, फारूख जमादार, जहागीर जमादार, अकील गोलंदाज, कुदरत भुसारी, शब्बीर म्हतापे, दत्तात्रय कोळेकर, भरत कोळेकर यांच्यासह हिंदू-मुस्लिम समाज बांधव मोठ्या संख्येने सहभागी झाले होते.
