लोणी प्रतिनिधी
गेल्या काही दिवसांपासून उकाड्याने त्रस्त झालेल्या नागरिकांना अखेर दिलासा मिळाला असून आंबेगाव तालुक्यातील लोणी, धामणी व परिसरात रविवारी सायंकाळी पावसाने दमदार हजेरी लावली. अचानक झालेल्या पावसामुळे वातावरणात गारवा निर्माण झाला असून नागरिकांनी समाधान व्यक्त केले.
पावसामुळे शेतकऱ्यांमध्येही आनंदाचे वातावरण पाहायला मिळाले. खरीप हंगामाच्या तयारीला वेग येणार असून शेतजमिनीत ओलावा निर्माण झाल्याने पेरणीसाठी पोषक परिस्थिती तयार झाली आहे. अनेक ठिकाणी रस्त्यांवर पाणी साचल्याचे चित्र दिसून आले, तर लहान मुले आणि युवकांनी पावसाचा आनंद लुटला.
गेल्या काही दिवसांपासून वाढलेल्या तापमानामुळे नागरिक हैराण झाले होते. मात्र, पावसाच्या आगमनामुळे तापमानात घट झाली असून वातावरण प्रसन्न झाले आहे. हवामान विभागाने पुढील काही दिवस परिसरात हलक्या ते मध्यम स्वरूपाच्या पावसाची शक्यता वर्तविली आहे.
