महाळुंगे, दि. २० जून २०२६ :
महाळुंगे वाहतूक विभागाचे वरिष्ठ पोलीस निरीक्षक श्री. निलेश वाघमारे व त्यांच्या सहकाऱ्यांनी महिंद्रा सर्कल, गेट क्र. २ येथे वाहतूक जनजागृती उपक्रम राबवून नागरिकांमध्ये सुरक्षित वाहतुकीबाबत जागरूकता निर्माण केली.
या उपक्रमांतर्गत हेल्मेट परिधान केलेले, वैध ड्रायव्हिंग लायसन्स जवळ बाळगणारे तसेच नियमानुसार नंबर प्लेट असलेल्या वाहनचालकांचे पुष्पगुच्छ देऊन स्वागत करण्यात आले. नियमांचे पालन करणाऱ्या नागरिकांचा सन्मान करत इतर वाहनचालकांनाही वाहतूक नियमांचे पालन करण्याचा सकारात्मक संदेश देण्यात आला.
यावेळी दुचाकीस्वार पंकज यावले यांनीही या उपक्रमाचे स्वागत करत सर्व नागरिकांना आवाहन केले की, “स्वतःच्या आणि आपल्या कुटुंबाच्या सुरक्षिततेसाठी नेहमी हेल्मेटचा वापर करा, वाहन चालविताना वैध ड्रायव्हिंग लायसन्स जवळ बाळगा आणि सर्व वाहतूक नियमांचे काटेकोरपणे पालन करा.”
महाळुंगे वाहतूक विभागाचा हा अभिनव उपक्रम नागरिकांकडून कौतुकास्पद ठरत असून, सुरक्षित वाहतुकीसाठी अशा जनजागृती मोहिमा सातत्याने राबविण्याची गरज व्यक्त केली जात आहे.
सुरक्षित वाहतूक, सुरक्षित जीवन!
