पुणे प्रतिनिधी
शिरूर : समाजातील एकल महिलांच्या सक्षमीकरणाला चालना देण्यासाठी तसेच त्यांच्या हक्क, अधिकार आणि शासकीय योजनांबाबत जनजागृती करण्याच्या उद्देशाने शिरूर नगरपरिषदेच्या महिला व बालविकास विभागामार्फत मंगळवार, दि. २३ जून २०२६ रोजी दुपारी ३.०० वाजता शिरूर नगरपरिषदेच्या जुने कार्यालय येथे ‘एकल महिला दिन’ कार्यक्रमाचे आयोजन करण्यात आले आहे.
एकल महिलांना सामाजिक, आर्थिक आणि वैयक्तिकदृष्ट्या सक्षम बनविण्याच्या दृष्टीने हा कार्यक्रम महत्त्वपूर्ण ठरणार असून, शासनामार्फत राबविण्यात येणाऱ्या विविध कल्याणकारी योजनांची सविस्तर माहिती यावेळी देण्यात येणार आहे. महिलांना रोजगार व स्वयंरोजगाराच्या संधी, बचत गटांच्या माध्यमातून आर्थिक स्वावलंबन, विविध शासकीय सुविधा तसेच त्यांच्या विकासासाठी उपलब्ध असलेल्या योजनांची माहिती या कार्यक्रमात दिली जाणार आहे.
कार्यक्रमात विविध क्षेत्रातील तज्ज्ञांचे मार्गदर्शन लाभणार असून, उपस्थित महिलांना त्यांच्या समस्या, अडचणी आणि अपेक्षा मांडण्याची संधीही उपलब्ध करून देण्यात येणार आहे. एकल महिलांच्या सर्वांगीण विकासासाठी शासनाच्या विविध उपक्रमांचा लाभ अधिकाधिक महिलांपर्यंत पोहोचावा, हा या कार्यक्रमामागील प्रमुख उद्देश असल्याचे नगरपरिषद प्रशासनाकडून सांगण्यात आले.
या कार्यक्रमास शिरूर शहरातील सर्व एकल महिलांनी मोठ्या संख्येने उपस्थित राहून उपलब्ध मार्गदर्शन, माहिती आणि शासकीय योजनांचा लाभ घ्यावा, असे आवाहन शिरूर नगरपरिषदेच्या नगराध्यक्षा सौ. ऐश्वर्या अभिजीत पाचर्णे, उपनगराध्यक्ष श्री. मितेश गादीया, महिला व बालकल्याण समितीच्या सभापती आयेशा कलिम सय्यद, उपसभापती स्वप्नाली जामदार तसेच मुख्याधिकारी प्रितम पाटील यांनी केले आहे.
कार्यक्रमाची माहिती
दिनांक : २३ जून २०२६ (मंगळवार)
वेळ : दुपारी ३.०० वाजता
स्थळ : शिरूर नगरपरिषद, जुने कार्यालय, शिरूर
महिला व बालविकास विभाग, शिरूर नगरपरिषद, घोडनदी
शासनाच्या विविध कल्याणकारी योजना, रोजगार व स्वयंरोजगाराच्या संधी, बचत गटांद्वारे आर्थिक स्वावलंबन तसेच महिलांच्या समस्या व अपेक्षा जाणून घेण्यासाठी आयोजित करण्यात आलेल्या या उपक्रमाचा लाभ शिरूर शहरातील सर्व एकल महिलांनी घ्यावा, असे आवाहन नगरपरिषद प्रशासनाने केले आहे.
