दोडामार्ग | प्रतिनिधी
दोडामार्ग परिसरातील एका गावातील माध्यमिक शाळेत शुक्रवारी गंभीर प्रकार घडला. एका १९ वर्षीय युवतीला पळवून नेल्याच्या संशयावरून संतप्त ग्रामस्थांच्या जमावाने थेट शाळेत घुसून एका ५५ वर्षीय शिक्षकाला मारहाण केली. या अचानक घडलेल्या प्रकारामुळे शाळा परिसरात तसेच गावात मोठी खळबळ उडाली.
घटनेची माहिती मिळताच पोलीस तातडीने घटनास्थळी दाखल झाले आणि त्यांनी परिस्थिती नियंत्रणात आणली. संबंधित शिक्षकाला सक्तीच्या रजेवर पाठवून त्याचे निलंबन करण्यात यावे, अशी मागणी ग्रामस्थांकडून करण्यात येत आहे.
माहितीनुसार, गावातील १९ वर्षीय तरुणी काही दिवसांपूर्वी बेपत्ता झाली होती. संबंधित शिक्षकानेच तिला पळवून नेल्याचा आरोप करत ग्रामस्थ आक्रमक झाले. ही माहिती गावात पसरताच मोठा जमाव थेट शाळेत पोहोचला. जमावाने शिक्षकाला वर्गाबाहेर बोलावून त्याची विचारपूस करत मारहाण केली.
घटनेची माहिती मिळताच पोलिसांनी तात्काळ हस्तक्षेप करत संबंधित शिक्षकाला जमावाच्या तावडीतून सोडवून पोलीस ठाण्यात आणले. त्यानंतर पोलिसांनी बेपत्ता तरुणी आणि शिक्षक या दोघांची समोरासमोर चौकशी केली.
चौकशीदरम्यान संबंधित तरुणीने, “मी आई-वडिलांकडे जाणार नसून शिक्षकासोबतच राहणार आहे,” असा स्पष्ट निर्णय पोलिसांसमोर व्यक्त केला. तिने यासंदर्भात लेखी जबाबही दिला असल्याची माहिती पोलिसांकडून देण्यात आली. संबंधित तरुणी ही कायद्यानुसार सज्ञान असल्याचेही स्पष्ट झाले आहे.
या निर्णयानंतर काही ग्रामस्थ अधिक संतप्त झाले. “संबंधित शिक्षक पुन्हा शाळेत दिसल्यास त्याला धडा शिकवू,” असा आक्रमक पवित्रा काहींनी पोलीस ठाण्यात घेतल्याचे समजते.
यावर पोलिसांनी ग्रामस्थांना कायदा हातात न घेण्याचा इशारा दिला. संबंधित तरुणी सज्ञान असून तिने स्वतःच्या इच्छेने निर्णय घेतला आहे. त्यामुळे कोणीही पुन्हा कायदा हातात घेण्याचा किंवा शिक्षकावर हल्ला करण्याचा प्रयत्न केल्यास कठोर कायदेशीर कारवाई करण्यात येईल, असा स्पष्ट इशारा पोलिसांनी दिला आहे.
