वणी प्रतिनिधी :
वणी पोलीस स्टेशनचे नव्याने रुजू झालेले ठाणेदार श्री. भानुदास पिदूरकर यांनी अवैध धंद्यांवर आळा घालण्यासाठी धडक मोहीम सुरू केली असून, त्याचाच भाग म्हणून वणी पोलिसांनी अवैध दारू विक्रेत्यांवर मोठी कारवाई करत तब्बल २० लाख १३ हजार ९७० रुपयांचा मुद्देमाल जप्त केला आहे.
दि. २२ जून रोजी वणी शहरात पोलीस पेट्रोलिंग सुरू असताना गुप्त माहितीच्या आधारे दीपक चौपाटी परिसरातून एका काळ्या रंगाच्या कारमधून तसेच मोपेडद्वारे अवैध दारू विक्रीसाठी वाहतूक होत असल्याची माहिती पोलिसांना मिळाली. त्यानुसार पोलिसांनी घुग्गुस रोडवर काळ्या रंगाची कार (क्र. MH 42 BE 9395) अडवून तपासणी केली.
तपासणीदरम्यान कारमध्ये विविध कंपनीच्या दारूच्या बाटल्या आढळून आल्या. जप्त करण्यात आलेल्या अवैध दारूची किंमत २७ हजार ७३० रुपये असून कारसह एकूण १९ लाख २७ हजार ७३० रुपयांचा मुद्देमाल पोलिसांनी ताब्यात घेतला. या प्रकरणी चालक प्रमोद भारत टोंगे (रा. शिंदोला) याला अटक करण्यात आली आहे.
यानंतर काही वेळातच दीपक चौपाटीहून पटवारी कॉलनीकडे जाणाऱ्या एका संशयित मोपेड (क्र. MH 29 BB 0308) ला पोलिसांनी थांबवून झडती घेतली. दुचाकीवरील मोठ्या पिशवीत ६ हजार २४० रुपये किमतीची बेकायदेशीर दारू आढळून आली. या प्रकरणी सुमित उद्धव झुंगे (वय १९) व शुभम अनंता वाघमारे (दोघेही रा. लालगुडा) यांच्या विरोधात गुन्हा दाखल करण्यात आला आहे.
या दोन्ही कारवायांमध्ये पोलिसांनी दोन वाहने व अवैध दारूचा साठा असा एकूण २० लाख १३ हजार ९७० रुपयांचा मुद्देमाल जप्त केला.
ही कारवाई पोलीस अधीक्षक कुमार चिंता, उपविभागीय पोलीस अधिकारी सुरेश दळवे व ठाणेदार भानुदास पिदूरकर यांच्या मार्गदर्शनाखाली पोउपनि साजिद सय्यद, पोहेका गजानन सावसाकडे, मारोती पाटील, पुरुषोत्तम डडमल, रितेश भोयर, मोरेश्वर खंडरे, नंदकुमार पप्पलवार, माधव दहिकांबळे आणि गजानन कुळमेथे यांच्या पथकाने यशस्वीरीत्या पार पाडली.
