जळगाव प्रतिनिधी :
प्रभाग क्रमांक १३ मधील मोहोडी रस्ता ते गुरु पेट्रोल पंप मार्गे पाचोरा रोडवरील मलंग शाह बाबा दर्गा परिसरातील सुमारे ३०० मीटर लांबीच्या खराब झालेल्या रस्त्याची तातडीने दुरुस्ती व डांबरीकरण करण्यात यावे, अशी मागणी नगरसेविका वैशाली अमित पाटील यांनी जळगाव महानगरपालिका आयुक्तांकडे निवेदनाद्वारे केली होती. या निवेदनाची तत्काळ दखल घेत आयुक्तांनी संबंधित विभागाला आवश्यक सूचना देत कार्यवाहीचे आदेश दिले आहेत.
सदर रस्त्यावर मोठ्या प्रमाणावर खड्डे पडल्याने वाहनचालक, पादचारी तसेच परिसरातील नागरिकांना दररोज अडचणींचा सामना करावा लागत आहे. पावसाळ्यात खड्ड्यांमध्ये पाणी साचत असल्याने अपघाताचा धोका वाढला असून शाळकरी विद्यार्थी, महिला, ज्येष्ठ नागरिक आणि व्यापाऱ्यांसाठी हा मार्ग धोकादायक बनला असल्याचे नगरसेविका वैशाली पाटील यांनी निवेदनातून निदर्शनास आणून दिले.
विशेषतः शाळेत ये-जा करणाऱ्या विद्यार्थ्यांच्या सुरक्षिततेचा गंभीर प्रश्न निर्माण झाला असून अनेक पालकांना आपल्या मुलांना याच मार्गाने शाळेत ने-आण करावी लागत आहे. तसेच धूळ, चिखल आणि असमतल रस्त्यामुळे नागरिकांच्या आरोग्यावरही विपरीत परिणाम होत असल्याचे निवेदनात नमूद करण्यात आले आहे.
स्थानिक नागरिकांकडून सातत्याने तक्रारी प्राप्त होत असल्याने संबंधित रस्त्याची तातडीने पाहणी करून अंदाजे ३०० मीटर रस्त्याचे डांबरीकरण व आवश्यक दुरुस्तीची कामे पावसाळ्यापूर्वी हाती घेण्यात यावीत, अशी मागणीही करण्यात आली होती.
नगरसेविका वैशाली अमित पाटील यांच्या निवेदनाची गंभीर दखल घेत महानगरपालिका आयुक्तांनी संबंधित अधिकाऱ्यांना त्वरित कार्यवाहीचे निर्देश दिले. प्रशासनाकडून मिळालेल्या सकारात्मक प्रतिसादाबद्दल नगरसेविका वैशाली अमित पाटील यांनी महानगरपालिका आयुक्त तसेच जळगाव शहराचे आमदार राजूमामा भोळे यांचे आभार मानले.
या कार्यवाहीमुळे परिसरातील नागरिकांच्या वाहतुकीचा प्रश्न लवकरच मार्गी लागण्याची अपेक्षा व्यक्त होत असून प्रशासनाच्या तत्पर भूमिकेचे नागरिकांकडून स्वागत करण्यात येत आहे.
