📍 पंढरपूर | प्रतिनिधी
पंढरपूर तालुका पोलीस स्टेशन यांच्या निदर्शनास आले आहे की, अनेक पालक शाळा, कॉलेज, ट्युशन किंवा इतर कारणांसाठी अल्पवयीन मुला-मुलींना मोटारसायकल चालवण्यासाठी देत आहेत. मात्र, अशा प्रकारामुळे अपघातांचे प्रमाण वाढत असून गंभीर घटना घडण्याची शक्यता निर्माण झाली आहे.
पोलीस प्रशासनाने दिलेल्या माहितीनुसार, अल्पवयीन मुलांना वाहन चालवताना वेगाचे नियंत्रण, वाहतुकीचे नियम आणि सुरक्षिततेचे भान पुरेसे नसते. अनेकदा ही मुले भरधाव वेगाने वाहन चालवत असल्याने अपघात होण्याचे प्रमाण वाढले आहे.
यामुळे पालकांनी आपल्या अल्पवयीन मुलांना दुचाकी किंवा इतर वाहने चालवण्यासाठी देणे टाळावे, असे आवाहन पोलिसांनी केले आहे. अन्यथा संबंधित पालक तसेच वाहन चालवणाऱ्या मुलांवर कायदेशीर कारवाई करून गुन्हा दाखल करण्यात येईल, असा इशारा पोलिसांकडून देण्यात आला आहे.
वाहतूक नियमांचे पालन करून मुलांच्या सुरक्षिततेला प्राधान्य द्यावे आणि जबाबदार नागरिक म्हणून सहकार्य करावे, असे आवाहनही पोलिस प्रशासनाने केले आहे.
