📍 श्रीरामपूर | प्रतिनिधी
श्रीरामपूर नगर परिषद च्या आरोग्य विभागाने शहरात सिंगल युज प्लास्टिकविरोधात विशेष तपासणी मोहीम राबवत मोठी कारवाई केली आहे. या मोहिमेदरम्यान प्लास्टिक पिशव्या, चहाचे कागदी कप, थर्माकोल व इतर अविघटनशील वस्तूंचा वापर करणाऱ्या ४ व्यावसायिकांकडून सुमारे ४० हजार रुपयांचा दंड वसूल करण्यात आला आहे.
नगर परिषदेने नियुक्त केलेल्या पथकाने शहरातील विविध भागात तपासणी करून प्लास्टिक कॅरी बॅग, सिंगल युज प्लास्टिक, थर्माकोल साहित्य तसेच बंदी असलेल्या वस्तूंची जप्ती केली. संबंधित व्यावसायिकांविरोधात नियमांनुसार कारवाई करण्यात आली असून ही मोहीम पुढेही दैनंदिन स्वरूपात सुरू राहणार असल्याचे प्रशासनाकडून सांगण्यात आले.
शहरातील व्यापारी, हातगाडीवरील फळ-भाजी विक्रेते तसेच हॉटेल व्यावसायिकांनी सिंगल युज प्लास्टिकचे उत्पादन, साठवणूक, वितरण, विक्री आणि वापर तात्काळ बंद करावा, असे आवाहन नगर परिषदेकडून करण्यात आले आहे.
केंद्र शासनाच्या पर्यावरण विभागाच्या प्लास्टिक कचरा व्यवस्थापन सुधारणा अधिसूचनेनुसार १२० मायक्रॉनपेक्षा कमी जाडीच्या प्लास्टिक पिशव्या, प्लास्टिक डिश, बाऊल, शिट्स, थर्माकोल साहित्य तसेच चहाचे कागदी ग्लास यांच्या निर्मिती, विक्री व वापरावर बंदी घालण्यात आली आहे.
शहर प्लास्टिकमुक्त करण्यासाठी नागरिक व व्यावसायिकांनी सहकार्य करावे आणि कारवाई टाळण्यासाठी नियमांचे पालन करावे, असे आवाहन नगराध्यक्ष करण ससाणे आणि मुख्याधिकारी मच्छिंद्र घोलप यांनी केले आहे.
