आमदार डॉ. रत्नाकर गुट्टे यांच्या हस्ते शुभारंभ; ग्रामीण विकासासाठी कटिबद्ध असल्याची ग्वाही
धारासूर प्रतिनिधी | दि. ०४/०६/२०२६
मुख्यमंत्री ग्रामसडक योजनेअंतर्गत मौजे धारासूर येथे राज्यमार्ग २४८ ते धारासूर या रस्त्याच्या सुधारणा कामाचे भूमिपूजन गंगाखेड विधानसभा मतदारसंघाचे आमदार डॉ. रत्नाकर गुट्टे यांच्या शुभहस्ते संपन्न झाले.
यावेळी आमदार गुट्टे यांनी उपस्थित नागरिकांशी मनमोकळा संवाद साधत गंगाखेड विधानसभा मतदारसंघात दर्जेदार पायाभूत सुविधा उपलब्ध करून देण्यासाठी आपण कटिबद्ध असल्याची ग्वाही दिली.
ते म्हणाले की, “आज मुख्यमंत्री ग्रामसडक योजनेअंतर्गत विविध रस्ते दुरुस्ती कामांच्या भूमिपूजनासाठी आपण एकत्र आलो आहोत. हा केवळ भूमिपूजनाचा कार्यक्रम नसून ग्रामीण विकासाच्या नव्या पर्वाची सुरुवात आहे. एखाद्या प्रदेशाच्या विकासाचा पाया हा त्या भागातील रस्त्यांवर उभा असतो. रस्ता हा फक्त एका गावाला दुसऱ्या गावाशी जोडत नाही, तर तो माणसांच्या आशा, स्वप्ने, अर्थकारण आणि विकासाला जोडणारा महत्त्वाचा दुवा असतो.”
या कार्यक्रमास जिल्हा परिषद सदस्य डॉ. सुभाष कदम, तालुका प्रभारी बालाजी लटपटे, सभापती मनोज मुंडे, पंचायत समिती सदस्य प्रताप कदम, कृष्णाजी सोळंके, सरपंच राजेभाऊ गवळे, मित्रमंडळाचे युवक तालुकाध्यक्ष कुलदीप जाधव, निवृत्ती कदम यांच्यासह संबंधित विभागाचे अधिकारी व कर्मचारी, गुट्टे काका मित्र मंडळाचे पदाधिकारी, कार्यकर्ते तसेच स्थानिक नागरिक मोठ्या संख्येने उपस्थित होते.
