बोगस शेतकरी कर्जदार तयार करून आर्थिक गैरव्यवहार; ४२ बनावट कर्जदार आढळले
खटाव प्रतिनिधी
खटाव तालुक्यातील विसापूर विकास सेवा सोसायटीमधील सचिव सुहास सूर्यकांत होले याने बोगस शेतकरी कर्जदार तयार करून तब्बल ९९ लाख ६६ हजार रुपयांचा अपहार केल्याचा धक्कादायक प्रकार उघडकीस आला आहे. या प्रकरणामुळे सहकारी संस्थांच्या कारभारावर प्रश्नचिन्ह निर्माण झाले असून परिसरात खळबळ उडाली आहे.
मिळालेल्या माहितीनुसार, संबंधित सचिवाने एक-दोन नव्हे तर तब्बल ४२ बोगस कर्जदार उभे करून त्यांच्या नावावर कर्ज दाखवून मोठा आर्थिक गैरव्यवहार केल्याचे तपासात समोर आले आहे.
यापूर्वी ३० नोव्हेंबर २०२३ रोजी ७३ लाख ५० हजार रुपयांच्या अपहाराबाबत पहिली तक्रार दाखल करण्यात आली होती. त्यानंतर झालेल्या लेखापरीक्षणात आणखी गैरव्यवहार उघडकीस आले. त्यामध्ये सचिवाने यापूर्वी केलेल्या आर्थिक अनियमिततेचाही पर्दाफाश झाला.
यानंतर पुन्हा १३ जून २०२५ रोजी पुसेगाव पोलीस ठाण्यात दुसरी तक्रार दाखल करण्यात आली. या तक्रारीनंतर संबंधित सचिव सुहास होले याच्याविरोधात गुन्हा नोंद करण्यात आला आहे.
दरम्यान, एवढ्या मोठ्या प्रमाणावर अपहार होत असताना सोसायटीचे संचालक मंडळ नेमके काय करत होते, असा प्रश्न आता उपस्थित केला जात आहे. सचिवाने संचालक मंडळाला कोणती माहिती दिली होती किंवा त्यांच्याकडून दुर्लक्ष झाले का, याबाबतही चर्चा सुरू झाली आहे.
या प्रकरणाची सखोल चौकशी करून दोषींवर कठोर कारवाई करावी, तसेच शेतकऱ्यांच्या नावावर झालेल्या गैरव्यवहाराचा तपास पारदर्शकपणे व्हावा, अशी मागणी नागरिक व सभासदांकडून केली जात आहे.
