खमनचेरु | प्रतिनिधी
शासकीय माध्यमिक तथा उच्च माध्यमिक कन्या आश्रमशाळा, खमनचेरु येथे शाळा प्रवेशोत्सव कार्यक्रम उत्साहात संपन्न झाला. या कार्यक्रमाच्या प्रमुख अतिथी म्हणून सौ. चंदा भगत मॅडम (शिक्षण विस्तार अधिकारी) उपस्थित होत्या. विद्यार्थिनींना मार्गदर्शन करताना त्यांनी “नियमित सराव हीच यशाची गुरुकिल्ली आहे,” असे प्रतिपादन केले.
पुढे बोलताना त्या म्हणाल्या की, केवळ अभ्यास करून यश मिळत नाही, तर केलेला अभ्यास दीर्घकाळ लक्षात राहण्यासाठी सातत्याने सराव करणे आवश्यक आहे. नियमित सराव आणि चिकाटीच्या जोरावर कोणतीही व्यक्ती यशापासून वंचित राहत नाही. त्या सध्या प्रकल्प कार्यालय नागपूर येथे कनिष्ठ शिक्षण विस्तार अधिकारी म्हणून कार्यरत आहेत.
यावर्षीच्या नवीन प्रवेश भरती लक्षांकाबाबत तसेच शाळेच्या निकालाबाबत त्यांनी समाधान व्यक्त केले. शाळेच्या पहिल्याच दिवशी विद्यार्थ्यांमध्ये नवचैतन्य निर्माण व्हावे या उद्देशाने नवागत विद्यार्थिनींचे पुष्पगुच्छ, स्कूल बॅग आणि पाठ्यपुस्तके देऊन स्वागत करण्यात आले.
तसेच मागील वर्षीच्या परीक्षेत प्राविण्य प्राप्त केलेल्या विद्यार्थिनींना शिक्षकांच्या हस्ते विविध प्रकारची बक्षिसे देऊन गौरविण्यात आले. त्यामुळे विद्यार्थिनींमध्ये उत्साहाचे वातावरण निर्माण झाले.
कार्यक्रमाला शालेय शिक्षण समितीचे अध्यक्ष एस. जी. सुंकेजी, उपाध्यक्ष नैतामजी, उच्च माध्यमिक शिक्षक डी. डी. भोंगळे, महिला अधीक्षिका कु. एन. एम. लाकडे मॅडम, अधीक्षक गजानन सानप तसेच गावातील प्रतिष्ठित नागरिक मनिलाताई विचारमंचावर उपस्थित होते.
कार्यक्रमाचे सूत्रसंचालन पी. आर. लोहकरे यांनी केले. प्रास्ताविक व्ही. एन. बडगेलवार यांनी तर आभार प्रदर्शन डी. डी. सूर्यवंशी यांनी केले.
कार्यक्रमाच्या यशस्वीतेसाठी पी. एस. नैताम, वाय. यू. पेंदाम, ए. एस. पोहाणे, आर. बी. दुर्गे, आर. पी. चव्हाण, एम. के. उराडे, कु. बी. डी. दुगा, कु. एम. यू. ठाकरे, टी. डी. तुमाने तसेच सर्व शिक्षक व शिक्षकेतर कर्मचाऱ्यांनी सहकार्य केले.
