परभणी | प्रतिनिधी
स्वच्छ भारत अभियान 2.0 अंतर्गत सुरू असलेल्या स्वच्छ सर्वेक्षण 2026 मोहिमेला गती देत परभणी महानगरपालिकेने प्रभाग क्रमांक 8 मधील गांधी पार्क परिसरातील सांगली बँकेजवळील दीर्घकाळापासूनची कचराकुंडी कायमस्वरूपी बंद करून त्या जागेचे सुशोभीकरण केले.
महापौर सय्यद इकबाल, उपमहापौर गणेश देशमुख आणि आयुक्त नितीन नार्वेकर यांच्या पुढाकारातून हा उपक्रम राबविण्यात आला. यावेळी शहर समन्वयक तुराब खान, स्वच्छता निरीक्षक प्रल्हाद देशमाने, न्यायरत्न घुगे तसेच स्थानिक व्यापारी आणि गांधी पार्क परिसरातील रहिवासी प्रकाश बारबिंड, शहाणे यांच्यासह अनेक नागरिक उपस्थित होते.
दीर्घकाळापासून नागरिकांसाठी डोकेदुखी ठरलेली कचराकुंडी हटविल्यामुळे परिसरातील नागरिकांनी समाधान व्यक्त केले. परिसर स्वच्छ, सुंदर आणि आरोग्यदायी ठेवण्यासाठी महानगरपालिकेने उचललेल्या या पावलाचे सर्व स्तरांतून स्वागत करण्यात आले.
यावेळी महापौर सय्यद इकबाल आणि आयुक्त नितीन नार्वेकर यांनी स्वच्छ सर्वेक्षण 2026 मध्ये परभणी शहराने उल्लेखनीय कामगिरी करण्यासाठी प्रत्येक नागरिकाने स्वच्छतेची जबाबदारी स्वीकारावी, कचरा योग्य ठिकाणीच टाकावा आणि महानगरपालिकेच्या स्वच्छता मोहिमेत सक्रिय सहभाग घ्यावा, असे आवाहन केले.
तसेच, स्वच्छ करण्यात आलेल्या जागेवर पुन्हा कचरा टाकणाऱ्यांवर कठोर कारवाई करण्याचे निर्देश अधिकाऱ्यांना देण्यात आले आहेत. बाजारपेठेतील ही कचराकुंडी बंद झाल्यामुळे व्यापारी व नागरिकांनी यापुढे त्या ठिकाणी कचरा न टाकता घरगुती व व्यावसायिक कचरा महानगरपालिकेच्या घंटागाडीतच द्यावा, असे आवाहन आयुक्त नितीन नार्वेकर यांनी केले.
