जामनेर | प्रतिनिधी
मतदार यादीच्या विशेष गहन पुनरीक्षण (SIR) मोहिमेमुळे शिक्षकांवर वाढलेल्या अतिरिक्त कामाच्या पार्श्वभूमीवर प्राथमिक व माध्यमिक शिक्षकांना किमान २० दिवस अध्यापन कार्यातून कार्यमुक्त करण्यात यावे, तसेच प्रत्येक शिक्षकास इतर शासकीय विभागातून एक सहाय्यक उपलब्ध करून द्यावा, अशी मागणी जामनेर तालुक्यातील शिक्षक संघटनांनी केली आहे.
यासंदर्भात प्रादेशिक शिक्षक संघटना (जळगाव जिल्हा), माध्यमिक शिक्षक संघटना (जामनेर तालुका) तसेच इतर प्राथमिक व माध्यमिक शिक्षकांच्या वतीने तहसीलदारांना निवेदन सादर करण्यात आले.
निवेदनात म्हटले आहे की, SIR मोहिमेअंतर्गत मतदार माहिती संकलन, कागदपत्रांची पडताळणी आणि प्रशासकीय प्रक्रिया अत्यंत वेळखाऊ व जबाबदारीची आहे. त्याचवेळी शिक्षकांना नियमित अध्यापन, शालेय प्रशासकीय कामे आणि इतर शैक्षणिक उपक्रमही पार पाडावे लागत असल्याने विद्यार्थ्यांच्या शैक्षणिक गुणवत्तेवर परिणाम होण्याची शक्यता निर्माण झाली आहे.
त्यामुळे शिक्षकांना SIR चे काम प्रभावीपणे आणि वेळेत पूर्ण करता यावे यासाठी त्यांना २० दिवसांसाठी अध्यापन कार्यातून कार्यमुक्त करावे, अशी मागणी करण्यात आली आहे.
याशिवाय, SIR मोहिमेदरम्यान आवश्यक कागदपत्रांची पडताळणी, माहिती संकलन आणि इतर प्रशासकीय कामांसाठी प्रत्येक शिक्षकास इतर शासकीय विभागातील एक सहाय्यक उपलब्ध करून द्यावा. त्यामुळे काम अधिक अचूक, जलद आणि नियोजित वेळेत पूर्ण होण्यास मदत होईल, असेही निवेदनात नमूद करण्यात आले आहे.
तहसीलदारांनी शिक्षकांचे निवेदन स्वीकारून संबंधित मागण्या वरिष्ठ स्तरावर पाठविण्याचे आश्वासन दिल्याची माहिती शिक्षक प्रतिनिधींनी दिली.
