कल्याण | प्रतिनिधी :
भारतीय हवामान विभागाने (IMD) ठाणे जिल्ह्यासाठी मंगळवार, दि. ७ जुलै २०२६ रोजी ऑरेंज अलर्ट जारी करत मुसळधार ते अतिमुसळधार पावसासह सोसाट्याच्या वाऱ्याचा इशारा दिला आहे. संभाव्य आपत्तीजन्य परिस्थिती लक्षात घेऊन जिल्हाधिकारी तथा जिल्हा आपत्ती व्यवस्थापन प्राधिकरणाचे अध्यक्ष डॉ. श्रीकृष्ण पांचाळ यांनी जिल्ह्यातील सर्व शैक्षणिक संस्थांना सुट्टी जाहीर केली आहे.
गेल्या तीन दिवसांपासून जिल्ह्यात सुरू असलेल्या मुसळधार पावसामुळे सखल भागात पाणी साचणे, झाडे उन्मळून पडणे तसेच वाहतुकीत अडथळे निर्माण होण्याची शक्यता लक्षात घेऊन हा निर्णय घेण्यात आला आहे. आपत्ती व्यवस्थापन अधिनियम, २००५ आणि शालेय शिक्षण व क्रीडा विभागाच्या संबंधित परिपत्रकानुसार जिल्हाधिकाऱ्यांनी हा आदेश जारी केला आहे.
दि. ७ जुलै २०२६ रोजी खालील शैक्षणिक संस्थांना सुट्टी राहणार आहे :
- सर्व अंगणवाड्या
- सर्व माध्यमांच्या प्राथमिक शाळा
- माध्यमिक व उच्च माध्यमिक शाळा
- सर्व महाविद्यालये
जिल्हा प्रशासनाने नागरिकांना अनावश्यक प्रवास टाळण्याचे, हवामान विभागाच्या सूचनांचे पालन करण्याचे तसेच आपत्कालीन परिस्थितीत प्रशासनाला सहकार्य करण्याचे आवाहन केले आहे.
