अमरावती | प्रतिनिधी
भातकुली तालुक्यात ‘माझे गाव आरोग्य संपन्न गाव’ अभियानाची प्रभावी अंमलबजावणी करण्यासाठी तालुकास्तरीय कृती दल समितीची बैठक पंचायत समिती भातकुली येथील समग्र शिक्षा अभियान सभागृहात उत्साहपूर्ण वातावरणात पार पडली.
बैठकीच्या अध्यक्षस्थानी गटविकास अधिकारी तृप्ती दुरुगकर होत्या. यावेळी सहाय्यक गटविकास अधिकारी प्रवीण वानखेडे, तालुका आरोग्य अधिकारी तथा समितीच्या सचिव डॉ. श्वेता सालफळे, बाल विकास प्रकल्प अधिकारी नारायण टेरे, वैद्यकीय अधिकारी डॉ. प्रवीण खराटे, डॉ. महेंद्र मेश्राम, डॉ. निखिल उपलवार, समुदाय आरोग्य अधिकारी डॉ. सोनाली देशमुख, विस्तार अधिकारी (पंचायत) निलेश भुयार, आरोग्य सहाय्यक निशांत सरप, वाघमारे तसेच ग्रामविकास अधिकारी, बाल विकास प्रकल्पाच्या पर्यवेक्षिका व विविध विभागांचे अधिकारी उपस्थित होते.
प्रारंभी तालुका आरोग्य अधिकारी डॉ. श्वेता सालफळे यांनी अभियानाची उद्दिष्टे, महिनानिहाय राबविण्यात येणारे आरोग्यविषयक उपक्रम तसेच भातकुली तालुक्यातील ग्रामपंचायतींना बेसलाईन असेसमेंटमध्ये मिळालेल्या गुणांची माहिती दिली.
यानंतर डॉ. प्रवीण खराटे व डॉ. सोनाली देशमुख यांनी ग्रामस्तरावर नियोजन, विविध विभागांमधील समन्वय आणि अभियान प्रभावीपणे राबविण्याबाबत मार्गदर्शन केले. तसेच राज्य, विभाग, जिल्हा व तालुकास्तरीय पुरस्कारांची माहिती देत, ७० किंवा त्यापेक्षा अधिक बेसलाईन स्कोअर असलेल्या ग्रामपंचायती स्पर्धेस पात्र असल्याचे सांगितले.
गटविकास अधिकारी तृप्ती दुरुगकर यांनी अभियानाचा आढावा घेत सर्व ग्रामपंचायतींनी समन्वयाने कार्य करून कृती आराखडा तयार करावा आणि आरोग्यविषयक निकषांमध्ये सुधारणा करण्यासाठी प्रयत्नशील राहावे, असे आवाहन केले. सहाय्यक गटविकास अधिकारी प्रवीण वानखेडे यांनीही ग्रामपंचायतींनी आरोग्य अभियानाला प्राधान्य देत उत्कृष्ट कामगिरीसाठी प्रयत्न करावेत, असे सांगितले.
बैठकीत सर्व संबंधित विभागांनी समन्वयाने कार्य करून भातकुली तालुक्यातील प्रत्येक गाव आरोग्यसंपन्न करण्याचा निर्धार व्यक्त केला. तसेच प्रत्येक ग्रामपंचायतीमध्ये दर महिन्याला कृती समितीची बैठक घेण्याचा निर्णय यावेळी घेण्यात आला.
