नेवासा | प्रतिनिधी
महाराष्ट्र राज्य शेत व शिवपाणंद रस्ता चळवळीच्या वतीने राळेगण सिद्धी येथे रविवारी (दि. ५ जुलै २०२६) ज्येष्ठ समाजसेवक पद्मश्री अण्णा हजारे यांच्या हस्ते ‘शिवपाणंद शेतरस्ता जनजागरण यात्रा’ व पदाधिकारी सन्मान अभियानाचा शुभारंभ करण्यात आला.
यावेळी चळवळीच्या उपाध्यक्ष नाथाभाऊ शिंदे पाटील (नेवासकर) यांनी शेतकरी व कार्यकर्त्यांच्या हक्कांसाठी केलेल्या उल्लेखनीय कार्याची दखल घेत अण्णा हजारे यांच्या हस्ते त्यांना ‘संघर्ष योद्धा’ सन्मानचिन्ह व प्रमाणपत्र प्रदान करून गौरविण्यात आले.
कार्यक्रमास चळवळीचे समन्वयक बाळासाहेब थोरात, अंबादास आव्हाड, मनोहर मतकर, कैलास दहिफळे, चळवळीचे मुख्य प्रतोद व प्रणेते शरदभाऊ पवळे, समाजसेविका तृप्तीताई देसाई, प्रसिद्धीप्रमुख रवींद्रभाऊ खुडे तसेच विविध पदाधिकारी, कार्यकर्ते आणि सामाजिक क्षेत्रातील मान्यवर उपस्थित होते.
‘शेत तिथे रस्ता, गाव तिथे समृद्धी’ हा संदेश घेऊन सुरू करण्यात आलेल्या या राज्यव्यापी जनजागरण यात्रेच्या माध्यमातून शेतकऱ्यांच्या हक्काच्या शेतरस्त्यांचा प्रश्न प्रभावीपणे मांडला जाणार आहे. अण्णा हजारे यांच्या मार्गदर्शनाखाली ही जनजागरण यात्रा राज्याच्या कानाकोपऱ्यात पोहोचवून शेतरस्त्यांचे प्रश्न मार्गी लावण्यासाठी कार्यकर्ते अधिक जोमाने काम करतील, असा विश्वास नाथाभाऊ शिंदे पाटील यांनी यावेळी व्यक्त केला.
