शिरूर | प्रतिनिधी :
शिरूर शहरातील महावितरणच्या सेवांबाबत नागरिकांमध्ये नाराजी वाढत असून, अॅव्हरेज वीजबिल, मीटर रीडिंगमधील त्रुटी आणि तक्रार निवारण प्रक्रियेतील विलंबाबाबत अनेकांनी प्रश्न उपस्थित केले आहेत.
नागरिकांच्या म्हणण्यानुसार, मागील वर्षीच्या तुलनेत यंदा अनेक ग्राहकांना अपेक्षेपेक्षा जास्त वीजबिले आली आहेत. प्रत्यक्ष मीटर रीडिंग न घेता काही ठिकाणी सरासरी (अॅव्हरेज) बिल देण्यात येत असल्याची तक्रार ग्राहकांकडून करण्यात येत आहे. त्यामुळे बिलांमध्ये मोठी तफावत निर्माण होत असल्याचे त्यांचे म्हणणे आहे.
तक्रारींचे निराकरण करण्यासाठी महावितरण कार्यालयात गेल्यानंतर “मीटरचा फोटो आणा”, “संबंधित अधिकाऱ्यांना भेटा” किंवा “दुसऱ्या टेबलावर जा” अशा सूचनांमुळे वारंवार हेलपाटे मारावे लागत असल्याची खंतही अनेक ग्राहकांनी व्यक्त केली आहे.
दरम्यान, शिरूर शहरात जुने वीजमीटर बदलून स्मार्ट मीटर बसविण्याचे काम सुरू आहे. या प्रक्रियेत काम करणारे कर्मचारी कोणत्या विभागाचे आहेत, तसेच कामकाजातील पारदर्शकतेबाबतही काही नागरिकांनी प्रश्न उपस्थित केले आहेत.
काही नागरिकांचे असेही म्हणणे आहे की, सामान्य ग्राहकांच्या तक्रारींवर प्रतिसाद मिळण्यास विलंब होत असताना, काही प्रभावशाली व्यक्ती किंवा मोठ्या प्रकल्पांशी संबंधित कामे तुलनेने अधिक वेगाने होत असल्याची भावना नागरिकांमध्ये आहे. या दाव्यांची अधिकृत पुष्टी झालेली नसली तरी या संदर्भात वस्तुस्थिती स्पष्ट करण्याची मागणी होत आहे.
वीज वितरण ही अत्यावश्यक सेवा असल्याने प्रत्येक ग्राहकाला समान, पारदर्शक आणि वेळेवर सेवा मिळावी, अचूक मीटर रीडिंगच्या आधारे बिलिंग व्हावे, अॅव्हरेज बिलिंगच्या तक्रारींचे तत्काळ निराकरण करावे आणि सर्व ग्राहकांशी समान वागणूक ठेवावी, अशी मागणी शिरूरकरांनी केली आहे.
महावितरणच्या वरिष्ठ अधिकाऱ्यांनी वाढत्या तक्रारींची दखल घेऊन वस्तुस्थितीची चौकशी करावी, आवश्यक सुधारणा कराव्यात आणि नागरिकांचा विश्वास दृढ करण्यासाठी प्रभावी उपाययोजना कराव्यात, अशी अपेक्षा व्यक्त करण्यात येत आहे.
