महाड (रायगड) | प्रतिनिधी :
महाड तालुक्यात गेल्या दोन दिवसांपासून सुरू असलेल्या मुसळधार पावसामुळे कुर्ले घाटात मोठी दरड कोसळली असून महाड–विन्हेरे मार्गावरील वाहतूक पूर्णपणे ठप्प झाली आहे. दरडीसोबत मोठ्या प्रमाणात मातीचा ढिगारा आणि झाडे रस्त्यावर आल्याने वाहनांची ये-जा बंद झाली आहे.
सततच्या पावसामुळे ही घटना घडल्याची प्राथमिक माहिती असून, सुदैवाने या दुर्घटनेत कोणतीही जीवितहानी झालेली नाही. मात्र, रस्ता बंद झाल्याने परिसरातील अनेक गावांचा संपर्क तात्पुरता तुटला असून नागरिकांची गैरसोय होत आहे.
स्थानिक नागरिकांच्या म्हणण्यानुसार, कुर्ले घाट परिसरात दरवर्षी पावसाळ्यात दरडी कोसळण्याच्या घटना घडतात. तरीही संबंधित स्थानिक प्रशासन किंवा राष्ट्रीय महामार्ग प्राधिकरणाकडून कायमस्वरूपी उपाययोजना करण्यात आलेल्या नसल्याची खंत नागरिकांनी व्यक्त केली आहे.
दरम्यान, परिसरात अद्यापही मुसळधार पाऊस सुरू असल्याने वाहनचालकांनी अत्यावश्यक असल्याशिवाय प्रवास टाळावा तसेच प्रवास करताना अत्यंत सावधगिरी बाळगावी, असे आवाहन प्रशासनाने केले आहे. दरड हटवून वाहतूक पूर्ववत करण्यासाठी संबंधित यंत्रणांकडून प्रयत्न सुरू आहेत.
