परभणी | प्रतिनिधी
परभणी महानगरपालिकेच्या स्वच्छता अभियानांतर्गत विष्णू जिनिंग परिसरातील बंद करण्यात आलेल्या कचरा कुंडीत पुन्हा कचरा टाकणाऱ्या व्यापाऱ्यांवर महापालिकेने दंडात्मक कारवाई केली. यासोबतच सिंगल-यूज प्लास्टिक, प्लास्टिक कॅरीबॅग आणि प्लास्टिक कंटेनरचा वापर करणाऱ्या व्यापाऱ्यांवरही कारवाई करण्यात आली.
या संयुक्त कारवाईत संबंधित व्यापाऱ्यांकडून एकूण ६,७०० रुपयांचा दंड वसूल करण्यात आला. शहर स्वच्छ व प्लास्टिकमुक्त ठेवण्यासाठी अशा प्रकारच्या कारवाया पुढेही सातत्याने सुरू राहणार असल्याचे महापालिका प्रशासनाने स्पष्ट केले आहे.
ही कारवाई महानगरपालिका आयुक्त नितीन नार्वेकर यांच्या मार्गदर्शनाखाली उपायुक्त प्रज्ञावंत कांबळे, तुकाराम कदम, सहाय्यक आयुक्त, मुख्य स्वच्छता निरीक्षक श्रीकांत कुरा तसेच स्वच्छता निरीक्षक शशी लहाने यांच्या नेतृत्वाखाली करण्यात आली.
यावेळी महापालिका प्रशासनाने नागरिक व व्यापाऱ्यांना सार्वजनिक ठिकाणी कचरा टाकू नये, तसेच सिंगल-यूज प्लास्टिकचा वापर टाळून स्वच्छता मोहिमेत सक्रिय सहकार्य करावे, असे आवाहन केले आहे.
