नेकनूर | प्रतिनिधी
हरविलेल्या वस्तू त्यांच्या मालकांपर्यंत सुरक्षितपणे पोहोचविण्याच्या उद्देशाने नेकनूर पोलिसांनी उल्लेखनीय कामगिरी करत CEIR (Central Equipment Identity Register) पोर्टलच्या माध्यमातून हरविलेले तीन मोबाईल फोन शोधून संबंधित तक्रारदारांना परत दिले.
मोबाईल हरवल्यानंतर तो पुन्हा मिळण्याची शक्यता कमी असल्याचे अनेकांना वाटते. मात्र, वेळेत पोलीस ठाण्यात तक्रार नोंदवून CEIR पोर्टलवर माहिती नोंदवल्यास हरविलेला मोबाईल शोधून मिळण्याची शक्यता वाढते, हे या कारवाईतून पुन्हा एकदा सिद्ध झाले आहे.
मोबाईल परत मिळालेले नागरिक
- भारत परमेश्वर शिंदे, रा. चौसाळा – Realme 13 Pro मोबाईल.
- भगवान ज्ञानोबा कुठे, रा. चौसाळा (हिंगणी खुर्द) – OPPO कंपनीचा मोबाईल.
- महादेव रसाळ, राधिका हॉटेल, मांजरसुंबा – OPPO कंपनीचा मोबाईल.
ही कारवाई केज विभागाचे उपविभागीय पोलीस अधिकारी व्यंकटराम साहेब यांच्या मार्गदर्शनाखाली सहाय्यक पोलीस निरीक्षक मंगेश साळवे यांच्या नेतृत्वात पोलीस हवालदार विशाल अर्जुन क्षीरसागर आणि पोलीस अंमलदार बाळा ढाकणे यांनी यशस्वीरीत्या पार पाडली.
मोबाईल परत मिळाल्यानंतर तक्रारदारांनी नेकनूर पोलिसांच्या तत्परतेचे व प्रामाणिक प्रयत्नांचे कौतुक करत पोलीस प्रशासनाचे आभार मानले.
नागरिकांना पोलिसांचे आवाहन
मोबाईल हरवल्यास किंवा चोरीला गेल्यास विलंब न करता तात्काळ जवळच्या पोलीस ठाण्यात तक्रार नोंदवावी. वेळेत तक्रार दिल्यास CEIR पोर्टलच्या माध्यमातून मोबाईल शोधणे तसेच त्याचा गैरवापर रोखणे अधिक सुलभ होते, असे आवाहन नेकनूर पोलिसांनी केले आहे.
नागरिकांची सुरक्षितता, कायद्याचे राज्य आणि लोकविश्वास कायम राखण्यासाठी नेकनूर पोलीस सदैव कटिबद्ध असून प्रत्येक तक्रारीची गांभीर्याने दखल घेत आवश्यक ती मदत करण्यासाठी तत्पर असल्याचे पोलिसांनी स्पष्ट केले आहे.
