पातूर | प्रतिनिधी :
छत्रपती संभाजीनगर येथे ५ जुलै २०२६ रोजी जी चॅम्प अबॅकसतर्फे आयोजित राज्यस्तरीय अबॅकस स्पर्धेत पातूर येथील किड्स पॅराडाईज पब्लिक स्कूलचा विद्यार्थी अनुराग सतीश सरोदे याने राज्यात प्रथम क्रमांक पटकावत पातूर शहराचा गौरव वाढविला आहे.
स्पर्धेतील यशानंतर छत्रपती संभाजीनगर येथील एम.आय.टी. मंथन हॉल येथे झालेल्या पुरस्कार वितरण समारंभात मान्यवरांच्या हस्ते अनुरागला प्रशस्तीपत्र, मेडल आणि ट्रॉफी प्रदान करून सन्मानित करण्यात आले.
अबॅकस ही विद्यार्थ्यांच्या बौद्धिक क्षमतेला चालना देणारी आणि अत्यंत आव्हानात्मक स्पर्धा मानली जाते. अशा स्पर्धेत अनुरागने मेहनत, चिकाटी आणि जिद्दीच्या बळावर राज्यस्तरीय प्रथम क्रमांक मिळवत उल्लेखनीय यश संपादन केले.
या यशाचे श्रेय अनुरागने रामानुजन अबॅकस कोचिंग क्लासेसच्या संचालिका सौ. मिताली काळपांडे, विलास काळपांडे, तसेच आपल्या आई-वडील, बहीण आणि गुरुजनांना दिले.
अनुरागच्या या उल्लेखनीय कामगिरीबद्दल पातूर शहरासह संपूर्ण परिसरातून त्याच्यावर अभिनंदनाचा वर्षाव होत असून, त्याच्या पुढील वाटचालीस शुभेच्छा दिल्या जात आहेत.
