मोहाडी (ता. दिंडोरी) | प्रतिनिधी
मोहाडी-खडक सुकेणे मार्गावरील कन्हेरी नाल्यात पिंपळगाव परिसरातील शौचालय साफ करणाऱ्या टँकरद्वारे मानवी मैला वाहत्या पाण्यात सोडला जात असल्याचा आरोप स्थानिक ग्रामस्थांनी केला आहे. हा प्रकार गेल्या आठवड्यापासून सुरू असल्याचा दावा ग्रामस्थांनी करत प्रशासनाकडे तातडीने चौकशीची मागणी केली आहे.
ग्रामस्थांच्या म्हणण्यानुसार, परिसरातील सांडपाण्यामुळे नाला आधीच प्रदूषित झाला असून त्यात मानवी मैला सोडला जात असल्याने प्रदूषणात आणखी भर पडत आहे. यामुळे परिसरातील शेतकऱ्यांच्या विहिरींचे पाणी दूषित होण्याची, तसेच पिके आणि पिण्याच्या पाण्यावर विपरीत परिणाम होण्याची भीती व्यक्त करण्यात येत आहे.
दरम्यान, काही ग्रामस्थांनी संबंधित टँकरचालकाला विरोध करत पुन्हा असा प्रकार करू नये, अशी ताकीद दिल्याचे सांगितले आहे.
या प्रकरणाची प्रशासनाने तातडीने चौकशी करून आरोप सत्य आढळल्यास संबंधितांवर गुन्हा दाखल करून कठोर कायदेशीर कारवाई करावी. तसेच ग्रामपंचायतीनेही हस्तक्षेप करून भविष्यात अशा प्रकारांना कायमस्वरूपी आळा घालावा, अशी मागणी ग्रामस्थांनी केली आहे.
