हालकी | प्रतिनिधी
ग्रामीण भागातील विद्यार्थ्यांच्या शैक्षणिक जडणघडणीत मोलाचे योगदान देणारे जि.प. प्राथमिक शाळा, हालकी येथील ज्येष्ठ शिक्षक व्यंकटराव रामराव सूर्यवंशी (पाटील) यांचा सेवानिवृत्ती गौरव सोहळा नुकताच उत्साहपूर्ण आणि भावनिक वातावरणात पार पडला.
सुमारे ३१ वर्षांच्या प्रदीर्घ शैक्षणिक सेवेनंतर श्री. सूर्यवंशी हे ३० जून २०२६ रोजी नियत वयोमानानुसार सेवानिवृत्त झाले. त्यांच्या कार्याचा गौरव करण्यासाठी बुधवार, दि. ८ जुलै २०२६ रोजी सकाळी ११ वाजता विशेष सत्कार समारंभाचे आयोजन करण्यात आले होते. कार्यक्रमाची सुरुवात मान्यवरांच्या हस्ते दीपप्रज्वलनाने झाली. यावेळी विद्यार्थी, शिक्षक, ग्रामस्थ आणि मान्यवर मोठ्या संख्येने उपस्थित होते.
कार्यक्रमाच्या अध्यक्षस्थानी शालेय व्यवस्थापन समितीच्या अध्यक्षा प्रियंका सुधाकर शिंदे या होत्या. त्यांनी आपल्या अध्यक्षीय भाषणात श्री. सूर्यवंशी यांच्या अध्यापनातील समर्पण, विद्यार्थ्यांप्रती असलेली आत्मीयता आणि शैक्षणिक कार्याचा गौरव केला.
यावेळी पंचायत समितीचे सभापती संजय हरिश्चंद्र सूर्यवंशी, जिल्हा परिषद सदस्य माणिकराव गायकवाड, पंचायत समिती सदस्य हमीद पटेल, गटविकास अधिकारी शितल शिंदे, ज्येष्ठ शिक्षण विस्तार अधिकारी अनिल पागे, गट शिक्षण अधिकारी विशाल मुळे, केंद्रप्रमुख प्रदीप कमठाणे, हालकीच्या सरपंच कांताबाई ज्ञानोबा सूर्यवंशी, तळेगाव बोरीचे सरपंच अक्षय पाटील तसेच तुकाराम लांडगे, खंडेराव चव्हाण, कमलाकर सूर्यवंशी, वेदप्रकाश भोसले यांच्यासह अनेक मान्यवर उपस्थित होते.
मनोगत व्यक्त करताना श्री. व्यंकटराव सूर्यवंशी भावूक झाले. त्यांनी आपल्या शैक्षणिक प्रवासातील अनुभव कथन करत विद्यार्थ्यांना शिक्षणाचे महत्त्व पटवून दिले. “शाळा ही केवळ इमारत नसून ती संस्कारांची पवित्र जागा आहे,” असे सांगत त्यांनी सहकारी शिक्षक आणि ग्रामस्थांना विद्यार्थ्यांच्या सर्वांगीण विकासासाठी सातत्याने कार्यरत राहण्याचे आवाहन केले.
कार्यक्रमाचे आयोजन शालेय व्यवस्थापन समिती, मुख्याध्यापक आणि शिक्षकवृंद यांनी केले. सूत्रसंचालन व आभारप्रदर्शनानंतर उपस्थितांनी श्री. सूर्यवंशी यांना भावपूर्ण निरोप देत त्यांच्या निरोगी, आनंदी आणि दीर्घायुष्यासाठी शुभेच्छा दिल्या.
