दोडामार्ग | प्रतिनिधी
अतिवृष्टीमुळे झालेल्या नुकसानीची पाहणी तसेच निवडणूक आढावा बैठकीस विनापरवानगी गैरहजर राहिल्याप्रकरणी दोडामार्गचे गटविकास अधिकारी (बीडीओ) अजिंक्य सावंत यांच्या निलंबनाची शिफारस करण्यात आली आहे. जिल्हाधिकारी तृप्ती धोडमिसे यांच्या निर्देशानंतर ही कारवाई प्रस्तावित करण्यात आली आहे.
अतिवृष्टी पाहणीवेळी अनुपस्थित
दि. ६ जुलै २०२६ रोजी जिल्हाधिकारी तृप्ती धोडमिसे यांनी दोडामार्ग तालुक्यातील अतिवृष्टी व पूरपरिस्थितीची पाहणी केली. यावेळी मौजे वझरे येथे झाडे पडून सुमारे ३० घरांचे नुकसान झालेल्या परिसराची त्यांनी प्रत्यक्ष पाहणी केली. मात्र, या महत्त्वपूर्ण दौऱ्यावेळी गटविकास अधिकारी अजिंक्य सावंत अनुपस्थित असल्याचे निदर्शनास आले.
आपत्ती व्यवस्थापनात निष्काळजीपणाचा आरोप
यापूर्वी २० एप्रिल २०२६ रोजी पावसाळ्यापूर्वीच्या आपत्ती व्यवस्थापनाच्या पूर्वतयारीसंदर्भात बैठक घेण्यात आली होती. या बैठकीत धोकादायक झाडे तोडण्यासाठी संबंधित ग्रामपंचायतींना सूचना देऊन त्याची प्रभावी अंमलबजावणी करण्याची जबाबदारी गटविकास अधिकाऱ्यांवर सोपविण्यात आली होती. मात्र, या निर्देशांची योग्य अंमलबजावणी न झाल्याने अनेक ठिकाणी झाडे कोसळून नुकसान झाल्याचा ठपका ठेवण्यात आला आहे.
निवडणूक आढावा बैठकीलाही गैरहजेरी
याच दिवशी तहसीलदार कार्यालयात आयोजित विशेष सखोल पुनरीक्षण (SIR) निवडणूक आढावा बैठकीलाही अजिंक्य सावंत गैरहजर राहिल्याचे समोर आले. या गैरहजेरीसाठी त्यांनी वरिष्ठांची पूर्वपरवानगी घेतली नसल्याचेही प्रशासनाच्या निदर्शनास आले आहे.
आपत्ती व्यवस्थापनासारख्या महत्त्वाच्या विषयात कथित निष्काळजीपणा आणि वरिष्ठ अधिकाऱ्यांच्या बैठकींना विनापरवानगी गैरहजर राहिल्याच्या पार्श्वभूमीवर जिल्हा प्रशासनाने त्यांच्या निलंबनाची शिफारस केली असून पुढील निर्णय शासनस्तरावर अपेक्षित आहे.
