धाराशिव | प्रतिनिधी
दि. १० जुलै २०२६ रोजी भारत माध्यमिक व उच्च माध्यमिक विद्यालय, माकणी येथे एसएससी व एचएससी बोर्ड परीक्षा फेब्रुवारी २०२६ मधील गुणवंत विद्यार्थ्यांचा सत्कार सोहळा उत्साहात पार पडला. यावेळी विद्यार्थ्यांना सन्मानपत्र, ट्रॉफी, मेडल, चांदीचे नाणे तसेच एकूण ₹३५ हजारांची रोख रक्कम विभागून देत गौरविण्यात आले.
कार्यक्रमाच्या प्रारंभी लोहारा-उमरगा तालुक्यातील शिष्यवृत्ती परीक्षा २०२६ मध्ये द्वितीय क्रमांक मिळविलेल्या कु. गायत्री मल्लीनाथ हुडगे हिचा विशेष सत्कार करण्यात आला.
यानंतर आदर्श विद्यार्थीनी कु. वैष्णवी हणमंत क्षीरसागर हिने लोहारा तालुक्यात एसएससी बोर्ड परीक्षेत प्रथम क्रमांक मिळविल्याबद्दल तसेच मराठी विषयात प्रथम आल्याबद्दल तिचा गौरव करण्यात आला. प्रशालेतून कु. सायली भास्कर सुरवसे हिने द्वितीय, तर चि. संकेत भास्कर सुरवसे याने तृतीय क्रमांक पटकावला. संकेत सुरवसे याने हिंदी विषयातही प्रथम क्रमांक मिळविला. तसेच चि. ऋषिकेश नागनाथ पवार याने गणित विषयात प्रथम, चि. प्रतीक बाळासाहेब मुसांडे याने इंग्रजी विषयात प्रथम, तर चि. अनिकेत कदम याने इतिहास-भूगोल विषयात प्रथम क्रमांक मिळवून यश संपादन केले.
कार्यक्रमाच्या अध्यक्षस्थानी शालेय समिती सदस्य सुधाकर दाजी आलमले होते. प्रमुख पाहुणे म्हणून दयानंद महाविद्यालय, लातूरचे प्राचार्य प्रशांत मंडलिक उपस्थित होते. कार्यक्रमाचे प्रास्ताविक विद्यालयाचे मुख्याध्यापक प्राचार्य गुंजोटे यांनी केले.
प्रमुख पाहुणे प्राचार्य प्रशांत मंडलिक यांनी विद्यार्थ्यांना मार्गदर्शन करताना मोबाईलपासून योग्य अंतर ठेवून नियोजनपूर्वक अभ्यास करण्याचा सल्ला दिला. तसेच, “आपल्या गुणवत्तेचा उपयोग समाज आणि मातृभूमीचे ऋण फेडण्यासाठी करा. आकाशाला गवसणी घालताना पाय मात्र नेहमी जमिनीवरच ठेवा,” असा प्रेरणादायी संदेश त्यांनी दिला.
यावेळी माकणी गावचे उपसरपंच फुलचंद आळंगे, शालेय समिती सदस्य भागवतराव तात्या आलमले, तुकाराम समुद्रवाने (आबा), शिवाजीराव जावळे (आण्णा), तंटामुक्त समितीचे अध्यक्ष पंडितदादा ढोणे, बक्षीसदाते पंडितराव साठे, अरुण नरसाळे, मनोज हुडगे, शिक्षक, प्राध्यापक, शिक्षकेतर कर्मचारी, पालक तसेच पत्रकार सदाशिव जाधव व आदम पठाण उपस्थित होते. यावेळी पालक व पत्रकारांचाही सत्कार करण्यात आला.
कार्यक्रमाचे सूत्रसंचालन दीपक शिंदे यांनी केले, तर बनसोडे सर यांनी उपस्थितांचे आभार मानले.
