अंबाजोगाई | प्रतिनिधी
अंबाजोगाई आगारातील प्रवाशांची गैरसोय दूर करण्यासाठी आमदार सौ. नमिताताई मुंदडा यांच्या पाठपुराव्यामुळे आगाराला ‘राजमाता जिजाऊ’ मालिकेच्या पाच नवीन एसटी बस उपलब्ध झाल्या आहेत. या नव्या बसांचा लोकार्पण सोहळा अंबाजोगाई आगारात उत्साहात पार पडला.
मागील अनेक दिवसांपासून आगारात जुन्या व अपुऱ्या बसांमुळे प्रवाशांना अडचणींचा सामना करावा लागत होता. वारंवार होणाऱ्या बिघाडामुळे प्रवासी तसेच चालक-वाहक यांना मनस्ताप सहन करावा लागत होता.
अंबाजोगाई हे शिक्षण, आरोग्य आणि धार्मिकदृष्ट्या महत्त्वाचे केंद्र असून श्री योगेश्वरी देवी, मुकुंदराज महाराज आणि श्री रेणुका देवी यांच्या दर्शनासाठी मोठ्या संख्येने भाविक येथे येत असतात. त्यामुळे आगारासाठी किमान दहा नवीन बसांची गरज असल्याची मागणी सातत्याने होत होती.
या पार्श्वभूमीवर आमदार नमिताताई मुंदडा यांच्या प्रयत्नांतून पहिल्या टप्प्यात पाच नवीन राजमाता जिजाऊ बस उपलब्ध झाल्या असून, यामुळे प्रवाशांना अधिक सुरक्षित, आरामदायी आणि दर्जेदार प्रवासाची सुविधा मिळणार आहे.
लोकार्पण कार्यक्रमाला बीड विभागाचे नवनियुक्त विभागीय वाहतूक अधीक्षक दत्तात्रेय काळम, वाहतूक अधीक्षक संतोष महाजन, मुंडे, आगार व्यवस्थापक अमर राऊत, वाहतूक निरीक्षक पल्लेवार, सहाय्यक वाहतूक निरीक्षक खाडे, नगरसेवक संजय गंभीरे यांच्यासह अनेक मान्यवर उपस्थित होते.
यावेळी आगार लेखाकार कोमटवार, बरीदे, सुशील कांबळे, प्रमोद जोशी, देवा, अनिल बनसोडे, वैजनाथ यादव, चालक इनामदार, जोगदंड तसेच आगारातील कर्मचारी आणि नागरिक मोठ्या संख्येने उपस्थित होते.
नवीन बस उपलब्ध झाल्याने अंबाजोगाई आगाराच्या सेवेत सुधारणा होऊन प्रवाशांची गैरसोय मोठ्या प्रमाणात दूर होईल, अशी अपेक्षा व्यक्त करण्यात येत आहे.
