जव्हारच्या दुर्गम भागात ६०० विद्यार्थ्यांना शैक्षणिक साहित्य; वृक्षारोपणातून पर्यावरणाचा संदेश

जव्हार | प्रतिनिधी

डहाणू वैतरणा प्रवासी सेवाभावी संस्था (DVPSS), वैतरणा स्टेशन कमिटी आणि दानशूर व्यक्तींच्या संयुक्त विद्यमाने जव्हार तालुक्यातील दुर्गम डोंगरदरी भागातील विद्यार्थ्यांसाठी शैक्षणिक साहित्य वाटप व वृक्षारोपणाचा सामाजिक उपक्रम उत्साहात पार पडला.

या उपक्रमाअंतर्गत आयरे, चौंडीपाडा, गेटपाडा, विनवळ आणि पिंपरुण येथील जिल्हा परिषद शाळांमधील सुमारे ६०० विद्यार्थ्यांना वह्या, पेन, पेन्सिल तसेच इतर आवश्यक शैक्षणिक साहित्याचे मोफत वितरण करण्यात आले.

कार्यक्रमाच्या अध्यक्षस्थानी संस्थेचे अध्यक्ष नागदेव पवार होते. उपाध्यक्ष सतीश धर्मा गावड यांनी विद्यार्थ्यांना शिक्षणाचे महत्त्व पटवून देत प्रामाणिकपणे शिक्षण घेऊन आदर्श नागरिक बनण्याचे आवाहन केले. अध्यक्ष नागदेव पवार यांनी शिक्षणासोबत सामाजिक आणि पर्यावरणीय जबाबदारी जपण्याचा संदेश दिला.

शैक्षणिक साहित्य वाटपानंतर पर्यावरण संवर्धनाचा संदेश देण्यासाठी वृक्षारोपणाचा उपक्रमही राबविण्यात आला. यामध्ये मान्यवर, ग्रामस्थ आणि विद्यार्थ्यांनी उत्स्फूर्त सहभाग घेत विविध वृक्षांची लागवड केली.

यावेळी सल्लागार सखाराम पाटील, वैतरणा कमिटी अध्यक्ष लक्ष्मण वैती, माजी सरपंच संतोष भोईर, उद्योजक भूपेश पाटील, निलेश दळवी, जयेश मोरे, युवा कार्यकर्ते युवराज पवार, व्योम पवार तसेच रुग्णमित्र राजेंद्र ढगे यांची प्रमुख उपस्थिती होती.

या उपक्रमाचे पालक, शिक्षक आणि ग्रामस्थांनी स्वागत करत संस्थेच्या सामाजिक बांधिलकीचे कौतुक केले. भविष्यातही शिक्षण, पर्यावरण संवर्धन आणि समाजोपयोगी उपक्रम सातत्याने राबविण्यात येतील, असा विश्वास संस्थेच्या पदाधिकाऱ्यांनी व्यक्त केला.