बीड | प्रतिनिधी
नेकनूर येथे मंजूर झालेले अप्पर तहसील कार्यालय तातडीने कार्यान्वित करण्यासाठी शिवसेनेचे बीड जिल्हा संपर्कमंत्री भरतशेठ गोगावले यांनी पुढाकार घेतला आहे. या मागणीसंदर्भात शंकर शिंदे यांनी सातत्याने पाठपुरावा करत मंत्री गोगावले यांच्याकडे पत्रव्यवहार केला होता.
या पाठपुराव्याची दखल घेत राज्याचे महसूल मंत्री चंद्रशेखर बावनकुळे यांनी नेकनूर येथे अप्पर तहसील कार्यालय सुरू करण्याबाबत संबंधित विभागाला तातडीने आवश्यक कार्यवाही करण्याचे आदेश दिले आहेत.
या निर्णयामुळे नेकनूर व परिसरातील नागरिकांची महसूल विभागाशी संबंधित शासकीय कामे अधिक जलद गतीने होण्यास मदत होणार आहे. तसेच नागरिकांचा वेळ आणि खर्च वाचणार असून ग्रामीण भागातील नागरिकांना महसूल सेवा अधिक सुलभपणे उपलब्ध होणार आहेत.
नेकनूर येथे अप्पर तहसील कार्यालय लवकरात लवकर कार्यान्वित व्हावे, अशी अपेक्षा परिसरातील नागरिकांकडून व्यक्त केली जात आहे.
