नाशिक | प्रतिनिधी
नाशिकमधील सातपूर-अंबड रोडवरील केबल पार्क परिसरात रस्त्यावरील मोठ्या खड्ड्यामुळे दुचाकी घसरून एका महिलेचा अपघात झाला. या अपघातात महिला जखमी झाली असून परिसरातील नागरिकांनी तातडीने धाव घेत तिला मदत केली.
प्रत्यक्षदर्शींच्या माहितीनुसार, रस्त्यातील खड्डा चुकवण्याच्या प्रयत्नात दुचाकीवरील नियंत्रण सुटल्याने महिला रस्त्यावर पडली. अपघातानंतर काही काळ वाहतुकीवरही परिणाम झाला. उपस्थित नागरिकांनी जखमी महिलेला सुरक्षित ठिकाणी हलवून आवश्यक मदत केली.
या घटनेनंतर सातपूर-अंबड रोडवरील रस्त्यांच्या दुरवस्थेबाबत नागरिकांनी तीव्र संताप व्यक्त केला आहे. वारंवार अशा प्रकारचे अपघात घडत असल्याने संबंधित विभागाने रस्त्यावरील खड्डे तातडीने बुजवून दुरुस्तीची कामे हाती घ्यावीत, अशी मागणी स्थानिकांकडून करण्यात आली आहे.
दरम्यान, या घटनेची माहिती संबंधित यंत्रणेला देण्यात आली असून अपघाताचे नेमके कारण आणि जखमी महिलेच्या प्रकृतीबाबत अधिकृत माहिती अद्याप उपलब्ध झालेली नाही.
