मारेगाव | प्रतिनिधी :
मारेगाव तालुक्यातील मार्डी सर्कल अंतर्गत दांडगाव (आपटी) येथे जुन्या वादातून एका व्यक्तीवर लाकडी काठीने हल्ला करण्यात आल्याची घटना घडली असून, या प्रकरणी आरोपीविरुद्ध गुन्हा दाखल करण्यात आला आहे.
मिळालेल्या माहितीनुसार, पुंडलिक घनश्याम ठमके (वय ४५) हे आपटी येथे वास्तव्यास असून त्यांचा गावातील नंदलाल माधव आत्राम (वय ५५) यांच्याशी गेल्या सहा महिन्यांपासून वाद सुरू होता. या वादातून आरोपीने यापूर्वीही फिर्यादीला जीवे मारण्याची धमकी दिल्याचा आरोप आहे.
घटनेच्या दिवशी पुंडलिक ठमके हे शेतातील रस्त्याने गावाकडे परतत असताना आरोपीच्या घरासमोरून जात होते. त्यावेळी नजरानजर झाल्याच्या कारणावरून आरोपीने त्यांना अश्लील शिवीगाळ करत लाकडी काठीने डोक्यावर तसेच हात-पायावर मारहाण केली. या हल्ल्यात ते गंभीर जखमी झाले.
जखमींना प्रथम उपचारासाठी स्थानिक रुग्णालयात दाखल करण्यात आले. प्रकृती गंभीर असल्याने पुढील उपचारासाठी त्यांना चंद्रपूर येथील ग्रामीण रुग्णालयात हलविण्यात आले आहे.
या प्रकरणी संबंधित आरोपीविरुद्ध गुन्हा दाखल करण्यात आला असून, पोलीस निरीक्षक सागर दानडे यांच्या मार्गदर्शनाखाली उपनिरीक्षक रवी बुरकुले, सहाय्यक पोलीस निरीक्षक दिगंबर किनाके आणि पोलीस शिपाई प्रवीण वारंजे पुढील तपास करत आहेत.
