नेर | प्रतिनिधी
नेर येथील श्री शिवाजी हायस्कूल समोर शाळा सुटल्यानंतर एका विद्यार्थ्याला भरधाव दुचाकीची धडक बसल्याची घटना घडली. या अपघातानंतर विद्यार्थ्यांच्या सुरक्षेचा प्रश्न ऐरणीवर आला असून, युवा सेनेच्या वतीने शाळा प्रशासन आणि नेर पोलिसांना निवेदन देत तातडीने सुरक्षा उपाययोजना करण्याची मागणी करण्यात आली आहे.
मिळालेल्या माहितीनुसार, श्री शिवाजी हायस्कूलमध्ये इयत्ता बारावीमध्ये शिक्षण घेणारा अर्पित अविनाश तुपट हा विद्यार्थी शाळा सुटल्यानंतर मुख्य प्रवेशद्वारातून बाहेर पडत असताना भरधाव दुचाकीने त्याला धडक दिली. या अपघातात तो सुदैवाने किरकोळ जखमी झाला.
या घटनेची सखोल चौकशी करून संबंधित वाहनचालकावर कायदेशीर कारवाई करावी, अशी मागणी युवा सेनेने आपल्या निवेदनातून केली आहे. तसेच शाळा सुटण्याच्या वेळेत हायस्कूल परिसरात पोलीस बंदोबस्त किंवा वाहतूक नियंत्रणाची व्यवस्था करावी, अशीही मागणी करण्यात आली आहे.
याशिवाय, मुख्य प्रवेशद्वाराजवळ अतिरिक्त शिक्षक, कर्मचारी किंवा सुरक्षा रक्षक नियुक्त करून विद्यार्थ्यांना सुरक्षितपणे रस्ता ओलांडण्यासाठी मदत करण्यात यावी, असेही निवेदनात नमूद करण्यात आले आहे.
यावेळी पालिका शिक्षण सभापती तथा युवा सेना प्रमुख सुनंदा चव्हाण, नगरसेवक तसेच युवा सेनेचे पदाधिकारी उपस्थित होते. विद्यार्थ्यांच्या सुरक्षेसाठी प्रशासनाने तातडीने ठोस उपाययोजना कराव्यात, अशी मागणी पालक आणि नागरिकांकडूनही करण्यात येत आहे.
