पाथरी | प्रतिनिधी :
पाथरी तालुक्यात अवैध वाळू माफियांची वाढती दादागिरी पुन्हा एकदा समोर आली आहे. ९ जुलै रोजी सोनपेठ रोडवरील शासकीय गोदाम परिसरात तहसीलदार नितीन गर्जे यांच्या नेतृत्वाखाली महसूल विभागाच्या पथकाने अवैध वाळूने भरलेला हायवा ट्रक (क्र. CG-19 BV-7029) जप्त केला. मात्र, तो तहसील कार्यालयाकडे आणत असताना वाहन पळवून नेण्यासाठी माफियांनी सिनेस्टाईल थरार घडविल्याची माहिती शासकीय फिर्यादीत नमूद करण्यात आली आहे.
फिर्यादीनुसार, जप्त केलेल्या ट्रकमध्ये महसूल कर्मचारी सोपान नरवडे यांना बसवून ताफा पाथरीकडे निघाला असताना एका कारने त्यांच्या वाहनांचा पाठलाग सुरू केला. माळीवाडा रस्त्यावर ट्रक अचानक वळवून धावत्या वाहनातून रस्त्यावर वाळू टाकत चालकाने पळ काढला. त्यामुळे महसूल विभागाची पाठलाग करणारी वाहने अडकल्याचे सांगण्यात आले.
यानंतर पाठलाग करणाऱ्या कारने रस्त्यात आडवी उभी राहून महसूल पथकाचा मार्ग अडविला. कारचालक वाहन सोडून फरार झाला. दरम्यान, ट्रकमधील महसूल कर्मचाऱ्याला मारहाण करून खाली ढकलण्यात आले तसेच त्याच्या जीवावर बेतण्याचा प्रयत्न झाल्याचाही आरोप शासकीय फिर्यादीत करण्यात आला आहे. या संपूर्ण घटनेचे व्हिडिओ चित्रीकरण शासकीय वाहनातील कॅमेऱ्यात झाल्याचेही नमूद करण्यात आले आहे.
घटनेनंतर महसूल विभागाने तातडीने तक्रार दिली. मात्र, ९ जुलैला घडलेल्या घटनेचा गुन्हा ११ जुलैच्या रात्री दाखल झाल्याने अनेक प्रश्न उपस्थित झाले आहेत. महसूल विभागाने तक्रार वेळेत दिल्याचा दावा केला असून, पोलिसांकडून संबंधित अधिकारी उपलब्ध नसल्याने विलंब झाल्याचे सांगण्यात आले. अखेर वरिष्ठ स्तरावर हालचाली झाल्यानंतर पाथरी पोलिसांनी चंदू राठोड, वाहन मालक आणि विष्णू घुगे यांच्याविरुद्ध विविध कलमांखाली गुन्हा दाखल केला आहे.
गुन्हा दाखल होण्यास विलंब का?
घटना ९ जुलै रोजी घडूनही गुन्हा दोन दिवसांनी दाखल झाल्याने महसूल आणि पोलीस यंत्रणेच्या कार्यपद्धतीवर प्रश्नचिन्ह निर्माण झाले आहे. या काळात प्रकरण जिल्हाधिकारी, पोलीस अधीक्षक आणि वरिष्ठ अधिकाऱ्यांपर्यंत पोहोचल्याची चर्चा असून, गुन्हा दाखल होण्यास झालेल्या विलंबामागील कारणांचा शोध घेण्याची मागणी होत आहे. या घटनेमुळे अवैध वाळू उत्खननाविरोधातील कारवाईदरम्यान महसूल कर्मचाऱ्यांच्या सुरक्षेचाही प्रश्न ऐरणीवर आला आहे.
