गोविंदपूर | प्रतिनिधी :
श्री संत गजानन महाराज पालखी सोहळ्याचे गोविंदपूर येथे सोमवारी मोठ्या उत्साहात आणि भक्तिमय वातावरणात स्वागत करण्यात आले. सुमारे ७०० वारकऱ्यांच्या ताफ्यासह पालखीचे आगमन होताच “अनंत कोटी ब्रह्मांडनायक… श्री संत गजानन महाराज की जय”च्या जयघोषाने संपूर्ण परिसर दुमदुमून गेला. भगवे ध्वज, टाळ-मृदंगाचा गजर, फुलांची उधळण, रांगोळ्या आणि फटाक्यांच्या आतषबाजीने श्रींचे स्वागत करण्यात आले.
पालखीचे स्वागत वैभव मुंडे (संचालक, जिल्हा मजूर संघ, धाराशिव) यांच्या हस्ते झाले. यावेळी ग्रामसेवक अशोक आमले, सरपंच अशोक मस्के, मधुकर मिसाळ, वसंत जाधव, सूर्यकांत मुंडे, पत्रकार अविनाश सावंत, विश्वास केंगार, हिरालाल मुंडे यांच्यासह ग्रामस्थ मोठ्या संख्येने उपस्थित होते.
गोविंदपूरसह देवधानोरा, हासेगाव, जवळा, एकुरका, बोरगाव, गौरगाव, नागुलगाव, खामसवाडी, नागझरवाडी, मंगरूळ, माळकरंजा, देवळाली आदी परिसरातील हजारो भाविकांनी श्रींच्या दर्शनासाठी गर्दी केली होती. सकाळपासूनच दर्शनासाठी रांगा लागल्या होत्या. पालखी आगमनानंतर परिसर भगवेमय झाला असून भाविकांमध्ये उत्साहाचे वातावरण निर्माण झाले.
बेसन-भाकरी महाप्रसादाची अनोखी परंपरा
गोविंदपूर येथील बेसन-भाकरीचा महाप्रसाद ही या पालखी सोहळ्याची खास परंपरा आहे. यासाठी संपूर्ण गावातून ज्वारी, गहू, डाळ, कांदा, लसूण आणि मिरची असा शिधा जमा केला जातो. यंदा सुमारे ५० क्विंटल ज्वारी आणि ४ क्विंटल डाळ जमा करण्यात आली. गावातील प्रत्येक घरातून तयार केलेल्या भाकऱ्या मंदिरात जमा करून वारकऱ्यांना महाप्रसाद देण्यात आला.
याशिवाय ७ हजार पाण्याच्या बाटल्या, ६०० ज्यूस पॅक, ५० किलो लोणचे, कांदा तसेच ३०० किलो जिलेबी व लाडू यांचेही वाटप करण्यात आले. अनेक भाविकांनी भाकरी, केळी, चिवडा आदी साहित्याचेही वितरण केले.
मोफत सेवा व रक्तदान शिबिर
वारकऱ्यांसाठी बालाजी सुरवसे आणि खंडू सुरवसे यांनी मोफत दाढी-कटिंग सेवा दिली. विराज मेडिकलचे औंदुबर मुंडे यांनी मोफत वैद्यकीय तपासणी व औषधांचे वितरण केले. तसेच रेणुका ब्लड बँक, धाराशिव यांच्या सहकार्याने रक्तदान शिबिराचे आयोजन करण्यात आले.
पालखी सोहळ्यादरम्यान शिराढोण पोलीस ठाण्याचे सहाय्यक पोलीस निरीक्षक एस. आर. घाडगे यांच्या मार्गदर्शनाखाली पोलीस अधिकारी व कर्मचाऱ्यांनी चोख बंदोबस्त ठेवला. विश्रांतीनंतर श्रींची पालखी पुढील मुक्कामासाठी ढोकी तेरणा कारखाना येथे रवाना झाली.
