| नाशिक प्रतिनिधी
नाशिक शहरातील दिंडोरी रस्त्यावरील रिलायन्स पेट्रोल पंपाजवळ रविवारी (दि. १२) सायंकाळी साडेपाच ते सहा वाजण्याच्या सुमारास कोयता गँगने दहशत माजविल्याची घटना घडली. पाच जणांच्या टोळक्याने हातात धारदार कोयते घेऊन परिसरात धिंगाणा घालत एका तरुणावर हल्ला केल्याने परिसरात भीतीचे वातावरण निर्माण झाले.
पोलिसांनी दिलेल्या माहितीनुसार, शौर्य सतीश गरुड (वय १८, रा. साई संदेश सोसायटी, कलानगर, दिंडोरी रोड) हा आपल्या चार साथीदारांसह घटनास्थळी आला होता. जुन्या वादातून त्यांनी प्रथमेश गायकवाड याला गाठून त्याच्यावर धारदार कोयत्याने हल्ला केला.
हल्ल्यानंतर संशयितांनी हातातील कोयते हवेत फिरवत रस्त्यावरून जाणाऱ्या नागरिकांना अर्वाच्य भाषेत शिवीगाळ केली. तसेच नागरिकांच्या अंगावर कोयते उगारून त्यांचा पाठलाग केल्याने परिसरात एकच खळबळ उडाली. या प्रकारामुळे व्यापाऱ्यांमध्ये आणि नागरिकांमध्ये भीतीचे वातावरण निर्माण झाले.
घटनेची माहिती मिळताच म्हसरूळ पोलीस ठाण्याच्या गुन्हे शोध पथकाने तातडीने घटनास्थळी धाव घेतली. पोलिसांनी शिताफीने सापळा रचून मुख्य संशयित शौर्य गरुड आणि त्याच्यासोबत असलेल्या एका विधीसंघर्षित बालकाला ताब्यात घेतले. त्यांच्या ताब्यातील धारदार कोयते जप्त करण्यात आले आहेत.
या गुन्ह्यात सहभागी असलेल्या उर्वरित तीन संशयितांचा पोलीस शोध घेत असून पुढील तपास सुरू आहे.
चौकट
- दिंडोरी रस्त्यावर कोयता गँगचा थरार.
- जुन्या वादातून तरुणावर धारदार शस्त्राने हल्ला.
- रस्त्यावर कोयते फिरवत नागरिकांमध्ये दहशत.
- मुख्य संशयितासह विधीसंघर्षित बालक पोलिसांच्या ताब्यात.
- उर्वरित तीन संशयितांचा शोध सुरू.
